കാസര്‍കോട്: ചില സാങ്കേതിക കാരണങ്ങളാലാണു കഴിഞ്ഞ ദിവസം പണമെത്തിക്കാന്‍ കഴിയാതിരുന്നതെന്നു ജില്ലാ ട്രഷറി ഓഫിസര്‍ കെ സീതാരാമ പറഞ്ഞു. ഇന്നലെയോടെ സാങ്കേതികമായ എല്ലാ തടസങ്ങളും നീക്കി ആവശ്യത്തിനുള്ള തുക എല്ലാ ട്രഷറികളിലും എത്തിച്ചിട്ടുണ്ടെന്നും ജനങ്ങള്‍ ആശങ്കപ്പെടേണ്ടതില്ലെന്നും അദ്ദേഹം പറഞ്ഞു.
ഇനിയുള്ള ദിവസങ്ങളില്‍ വിവിധ സാമൂഹിക ക്ഷേമ പെന്‍ഷനുകളും സര്‍ക്കാര്‍ ആനുകൂല്യങ്ങളും കൈപ്പറ്റുന്നവര്‍ക്കും ട്രഷറിയില്‍ എത്തി കേന്ദ്രസര്‍ക്കാരിന്റെ മാനദണ്ഡമനുസരിച്ച് അനുവദിക്കുന്ന തുക കൈപ്പറ്റാമെന്നും അദ്ദേഹം അറിയിച്ചു.

അടുപ്പില്‍ തീ പുകയണ്ടേ......
(യു.വി ശാന്ത, സ്‌കൂളിലെ പാ ചക തൊഴിലാളി, ചന്തേര)

'തീയും പുകയുമേറ്റു വച്ചു വാങ്ങിയാല്‍ കിട്ടുന്നത് തുച്ഛമായ പ്രതിഫലമാണ്. രണ്ടു മാസത്തെ ശമ്പളം ഇപ്പോള്‍ കിട്ടാനുണ്ട്. മണിക്കൂറുകളോളം ക്യൂവില്‍ നിന്ന് ഒടുവില്‍ കിട്ടിയ മറുപടി പണമില്ലെന്ന് . നേരത്തെ പ്രധാനധ്യാപകര്‍ നേരിട്ടു ശമ്പളം തരുന്നതായിരുന്നു രീതി. ആറുമാസം മുമ്പാണ് ശമ്പളം ബാങ്ക് അക്കൗണ്ട് വഴിയാക്കിയത്. ഇങ്ങനെ പോയാല്‍ വീട്ടിലെ അടുക്കള പൂട്ടേണ്ടി വരും. ഇങ്ങനെയൊരു ദുരിതം അടുത്തെങ്ങും ഉണ്ടായിട്ടില്ല'.

ചെക്ക് മാറാനും കഴിയുന്നില്ല
(കരാറുകാരന്‍, മുഹമ്മദ് കുഞ്ഞി പെരുമ്പള)

'വീടുകളില്‍ ഗ്രാനൈറ്റ് പണിയുന്ന കരാറുകാരനാണു ഞാന്‍. വീട്ടുകാര്‍ ഗ്രാനൈറ്റ് പണിയാനായി തന്ന ചെക്ക് മാറാനാകാത്ത സ്ഥിതിയാണുള്ളത്. ബാങ്കിന്റെ അനാസ്ഥയാണ് ഇതിനു കാരണമെന്നു സംശയിക്കുന്നു.
കള്ളപ്പണം കണ്ടെത്താന്‍ കേന്ദ്രസര്‍ക്കാര്‍ കൊണ്ടുവന്ന നയത്തെ സ്വീകരിക്കുന്നുവെങ്കിലും വേണ്ടത്ര മുന്‍കരുതല്‍ ഇല്ലാത്തതാണ് ജനം ഇങ്ങനെ പരക്കം പായാന്‍ ഇടയാക്കിയത്. എല്ലാ സൗകര്യത്തോടും കൂടി പുതിയനയം നടപ്പാക്കുകയാണെങ്കില്‍ സര്‍ക്കാരിനെ അഭിനന്ദിച്ചേനെ.
ഇപ്പോള്‍ ഒന്നും ലഭിക്കാത്തെ നട്ടം തിരിയാനുള്ള അവസരമൊരുക്കിയ സര്‍ക്കാരിനോട് പ്രതിഷേധമാണ് പറയാനുള്ളത്'.