കോഴിക്കോട്: സംസ്ഥാന ലഹരി വര്‍ജന മിഷന്‍ രൂപീകരിച്ച 'വിമുക്തി' മദ്യനിരോധന പ്രസ്ഥാനമല്ലെന്നും മദ്യവര്‍ജനത്തിനു വേണ്ടിയാണെന്നും എക്‌സൈസ്-തൊഴില്‍ വകുപ്പ് മന്ത്രി ടി.പി രാമകൃഷ്ണന്‍. 'വിമുക്തി' ജില്ലാതല കമ്മിറ്റി രൂപീകരണ യോഗത്തില്‍ അധ്യക്ഷത വഹിച്ചു സംസാരിക്കുകയായിരുന്നു അദ്ദേഹം. മദ്യനിരോധനം എന്ന ആശയവുമായി സര്‍ക്കാരിനു യോജിപ്പില്ല. മദ്യം നിരോധിച്ച സംസ്ഥാനങ്ങളിലെയും രാജ്യങ്ങളിലെയും അനുഭവം തെളിയിക്കുന്നത് ഇതാണ്. 'വിമുക്തി'യിലൂടെ സര്‍ക്കാര്‍ നേരിട്ട് ലഹരി വര്‍ജന പ്രവര്‍ത്തനത്തിന് നേതൃത്വം നല്‍കുകയാണ്. തദ്ദേശ സ്വയംഭരണ സ്ഥാപനങ്ങളുടെ സഹകരണത്തോടെ ജില്ലാതലം മുതല്‍ വാര്‍ഡ്തലം വരെയുള്ള കമ്മിറ്റികള്‍ രൂപീകരിക്കുമെന്നും മന്ത്രി പറഞ്ഞു.
ലഹരിക്ക് അടിമപ്പെട്ടവരെ ചികിത്സിക്കാനുള്ള ഡീ അഡിക്ഷന്‍ സെന്ററുകള്‍ മുഴുവന്‍ ജില്ലാ ആശുപത്രികളിലും തുടങ്ങും. കൂടാതെ കോഴിക്കോട് എക്‌സൈസ് വകുപ്പും ഡീ അഡിക്ഷന്‍ സെന്റര്‍ തുടങ്ങും. നിലവില്‍ പ്രവര്‍ത്തിക്കുന്ന സ്വകാര്യ ഡീ അഡിക്ഷന്‍ സെന്ററുകളെ യോജിപ്പിച്ച് പിന്തുണ നല്‍കി ശക്തിപ്പെടുത്തും. സ്പിരിറ്റിന്റെ വരവ് കുറഞ്ഞിട്ടുണ്ട്. എന്നാല്‍ അപകടകരമായ മയക്കുമരുന്നുകളും മറ്റു ലഹരിപദാര്‍ഥങ്ങളുടെയും വരവ് ഉല്‍കണ്ഠപ്പെടുത്തുന്നതാണെന്നും അദ്ദേഹം ചൂണ്ടിക്കാട്ടി.
ജില്ലാ പഞ്ചായത്ത് പ്രസിഡന്റ് ചെയര്‍മാനും കലക്ടര്‍ കണ്‍വീനറുമായാണ് ജില്ലാതല കമ്മിറ്റി രൂപീകരിച്ചത്. 'വിമുക്തി' ജില്ലാതല പ്രഖ്യാപനവും റാലിയും ജനുവരി 12ന് നടത്താനും യോഗം തീരുമാനിച്ചു. യോഗത്തില്‍ എം.എല്‍.എമാരായ കെ. ദാസന്‍, വി.കെ.സി മമ്മദ് കോയ, എ. പ്രദീപ്കുമാര്‍, പുരുഷന്‍ കടലുണ്ടി, ഇ.കെ വിജയന്‍, ജില്ലാ പഞ്ചായത്ത് പ്രസിഡന്റ് ബാബുപറശ്ശേരി, എ.ഡി.എം ടി. ജനില്‍കുമാര്‍, അസി. കലക്ടര്‍ കെ. ഇമ്പശേഖര്‍, ജോയിന്റ് എക്‌സൈസ് കമ്മിഷണര്‍ പി. ജയരാജ്, ഡെപ്യൂട്ടി എക്‌സൈസ് കമ്മിഷണര്‍ സുരേഷ് പി.കെ സംബന്ധിച്ചു.