അടിമാലി: അടിമാലി വിദ്യാഭ്യസ ഉപജില്ല സ്‌കൂള്‍ കലോത്സവം അഞ്ചു മുതല്‍ ഏഴുവരെ ദേവിയാര്‍ കോളനി ഗവ. വൊക്കേഷണല്‍ ഹയര്‍ സെക്കന്‍ഡറി സ്‌കൂളില്‍ നടക്കും.
കലോത്സവത്തിന്റെ ഒരുക്കങ്ങള്‍ പൂര്‍ത്തിയായതായി ജനറല്‍ കണ്‍വീനര്‍ പി വിജയന്‍, പ്രോഗ്രാം കമ്മിറ്റി ചെയര്‍മാന്‍ എം.എ അന്‍സാരി, പി .ടി. എ പ്രസിഡന്റ് ടി എം നൗഷാദ്, കെ.യു ബിജു, സബ്കമ്മിറ്റി ഭാരവാഹികളായ സി പി എല്‍ദോസ് വാളറ, ഒ.ടി കുര്യാക്കോസ് എന്നിവര്‍ അറിയിച്ചു.സബ്ജില്ലയിലെ 68 സ്‌കൂളുകളില്‍ നിന്നായി 2500 പ്രതിഭകള്‍ വിവിധ മത്സരങ്ങളില്‍ മാറ്റുരയ്ക്കും. നാല് വിഭാഗങ്ങള്‍ കൂടാതെ അറബിക്, സംസ്‌കൃതം കലോത്സവങ്ങളും ഇതോടൊപ്പം നടക്കും.
മൂന്നു ദിവസം എട്ടു വേദികളിലായാണ് മത്സരങ്ങള്‍ ക്രമീകരിച്ചിട്ടുള്ളത്. അഞ്ചിന് വൈകിട്ട് നാലിന് ഇരുമ്പുപാലത്തു നിന്നും ആരംഭിക്കുന്ന സാംസ്‌കാരിക റാലി അടിമാലി പൊലിസ് ഇന്‍സ്‌പെക്ടര്‍ ടി.എ യൂനസ് ഫ്‌ളാഗ് ഓഫ് ചെയ്യും.
തുടര്‍ന്ന് സ്‌കൂളില്‍ നടക്കുന്ന പൊതുസമ്മേളനം എസ് രാജേന്ദ്രന്‍ എം.എല്‍.എ ഉദ്ഘാടനം ചെയ്യും. റോഷി അഗസ്റ്റിന്‍ എം.എല്‍.എ മുഖ്യാഥിതിയായി പങ്കെടുക്കും. കലോത്സവത്തിന്റെ ഉദ്ഘാടനം ചലചിത്രതാരം ഗിന്നസ് മനോജ് നിര്‍വഹിക്കും. ജില്ലാ പഞ്ചായത്ത് പ്രസിഡന്റ് കൊച്ചുത്രേസ്യാ പൗലോസ് മുഖ്യ പ്രഭാഷണം നടത്തും. ബ്ലാക്ക് പഞ്ചായത്ത് പ്രസിഡന്റ് ആര്‍ മുരുകേശന്‍ അധ്യക്ഷത വഹിക്കും. അടിമാലി ഗ്രാമപഞ്ചായത്ത് പ്രസിഡന്റ് സ്മിത മുനിസ്വാമി, ജില്ലാ പഞ്ചായത്ത് അംഗം ഇന്‍ഫന്റ് തോമസ്, ബ്ലോക്ക് പഞ്ചായത്ത് വൈസ് പ്രസിഡന്റ് മോളി പീറ്റര്‍, ഗ്രാമപഞ്ചായത്ത് വൈസ് പ്രസിഡന്റ് ബിനു ചോപ്ര തുടങ്ങിയവര്‍ പ്രസംഗിക്കും. സമാപന സമ്മേളനം ഏഴിന് വൈകിട്ട് അഞ്ചിനു നടക്കും.