മാഡ്രിഡ്: സീസണിലെ എല്‍ ക്ലാസിക്കോ പോരാട്ടത്തിലെ ആദ്യ മത്സരം ഇന്ന്. ബാഴ്‌സയുടെ തട്ടകമായ നൗ കാംപിലാണ് മത്സരം. ലീഗില്‍ തോല്‍വി അറിയാതെ കുതിക്കുന്ന ഏക ടീമാണ് റയല്‍ മാഡ്രിഡ്. ഒന്നാം സ്ഥാനത്തുള്ള അവരെ സീസണിലെ ആദ്യ ലാ ലിഗ തോല്‍വിയിലേക്ക് തള്ളിയിടുക ലക്ഷ്യമിട്ടാണ് ബാഴ്‌സ ഇറങ്ങുന്നത്. ഇരു ടീമുകള്‍ക്കും പരുക്കാണ് വില്ലനായി നില്‍ക്കുന്നത്. ഗെരത് ബെയ്‌ലിന്റെ അഭാവത്തിലാണ് റയല്‍ ഇറങ്ങുന്നത്. ഒപ്പം മധ്യനിരയിലെ അച്ചുതണ്ട് ടോണി ക്രൂസും ഇറങ്ങാന്‍ സാധ്യതയില്ല. കറ്റാലന്‍ പടക്ക് ജെറാര്‍ഡ് പിക്വെ, ജോര്‍ദി ആല്‍ബ എന്നിവരുടെ സേവനവും ലഭിച്ചേക്കില്ല.
നിലവില്‍ 13 മത്സരങ്ങള്‍ പൂര്‍ത്തിയായപ്പോള്‍ 33 പോയിന്റുമായി റയല്‍ ഒന്നാം സ്ഥാനത്താണ്. ഇത്രയും മത്സരങ്ങളില്‍ നിന്നു ബാഴ്‌സലോണയ്ക്ക് 27 പോയിന്റുകള്‍. റയലിനെ വീഴ്ത്തി പോയിന്റ് പട്ടികയിലെ അന്തരം കുറയ്ക്കുകയെന്ന ലക്ഷ്യവും കറ്റാലന്‍ പടയ്ക്കുണ്ട്. സെവിയ്യ 27 പോയിന്റുകളുമായി ബാഴ്‌സയ്ക്ക് ശക്തമായ വെല്ലുവിളിയുയര്‍ത്തി മൂന്നാം സ്ഥാനത്ത് നില്‍ക്കുന്നുണ്ട് എന്നതിനാല്‍ അഭിമാന പോരാട്ടത്തില്‍ വിജയത്തില്‍ കുറഞ്ഞതൊന്നും എന്ററിക്കെക്കും സംഘത്തിനും ആശ്വാസം നല്‍കില്ല.