കൊടുവള്ളി: സംസ്ഥാന യുവജന ക്ഷേമ ബോര്‍ഡും കൊടുവള്ളി ബ്ലോക്ക് പഞ്ചായത്തും സംയുക്തമായി സംഘടിപ്പിക്കുന്ന 'കേരളോത്സവം 2016'ന് ആവിലോറയില്‍ നടന്ന വോളിബോള്‍ മത്സരങ്ങളോടെ തുടക്കമായി. ചടങ്ങ് ബ്ലേക്ക് പഞ്ചായത്ത് പ്രസിഡന്റ് സി.ടി വനജ ഉദ്ഘാടനം ചെയ്തു. കിഴക്കോത്ത് ഗ്രാമപഞ്ചായത്ത് പ്രസിഡന്റ് എന്‍.സി ഉസ്സയിന്‍ മാസ്റ്റര്‍ അധ്യക്ഷനായി.
ബ്ലോക്ക് പഞ്ചായത്ത് വൈസ് പ്രസിഡന്റ് സൂപ്പര്‍ അഹമ്മദ് കുട്ടി ഹാജി, സ്റ്റാന്‍ഡിങ് കമ്മിറ്റി ചെയര്‍പേഴ്‌സന്‍ മൈമൂന ഹംസ, ബ്ലോക്ക് പഞ്ചായത്ത് മെമ്പര്‍മാരായ എ.പി ഉസ്സയിന്‍, റംല, ഒ.കെ.എം കുഞ്ഞി, ബീന ജോര്‍ജ്, പി.കെ മൊയ്തീന്‍ ഹാജി, വോളിബോള്‍ കോഡിനേറ്റര്‍ മുജീബ് ആവിലോറ, ശ്രീകല സംസാരിച്ചു.
വോളിബോള്‍ ഫൈനല്‍ മത്സരത്തില്‍ ആതിഥേയരായ കിഴക്കോത്ത് പഞ്ചായത്തിനെ ഒന്നിനെതിരേ രണ്ട് സെറ്റുകള്‍ക്കു പരാജയപ്പെടുത്തി ഓമശ്ശേരി പഞ്ചായത്ത് ജില്ലാതല മത്സരത്തിനു യോഗ്യത നേടി. തുടര്‍ മത്സരങ്ങള്‍ കബഡി ഈങ്ങാപ്പുഴ ജി.എച്ച്.എസ്.എസ് ഗ്രൗണ്ടില്‍ വച്ചും ക്രിക്കറ്റ് ഓമശ്ശേരി പഞ്ചായത്ത് മിനി സ്റ്റേഡിയത്തിലും പഞ്ചഗുസ്തി കൂടരഞ്ഞി പഞ്ചായത്ത് ഓഫിസ് ഹാളിലും ചെസ് മത്സരവും രചനാ മത്സരങ്ങളും കൊടുവള്ളി ബ്ലോക്ക് പഞ്ചായത്ത് ഹാളിലും കലാമത്സരങ്ങള്‍ താമരശ്ശേരി വ്യാപാര ഭവന്‍ ഓഡിറ്റോറിയത്തിലും നടക്കും.
വൈകിട്ട് താമരശ്ശേരി വ്യാപാര ഭവനില്‍ നടക്കുന്ന സമാപന സമ്മേളനം കാരാട്ട് റസാഖ് എം.എല്‍.എ ഉദ്ഘാടനം ചെയ്യും. ജോര്‍ജ് എം. തോമസ് എം.എല്‍.എ സമ്മാനദാനം നിര്‍വഹിക്കും.