തലശ്ശേരി: റവന്യൂ ജില്ലാ സ്‌കൂള്‍ കലോത്സവം 6 മുതല്‍ 10 വരെ തലശ്ശേരിയില്‍ നടക്കും. എല്ലാ ഒരുക്കങ്ങളും പൂര്‍ത്തിയായതായി ജില്ലാ വിദ്യാഭ്യാസ അഡ്മിനിസ്‌ട്രേറ്റീവ് അസിസ്റ്റന്റ് സി.പി പത്മരാജും പ്രോഗ്രാം കമ്മറ്റി കണ്‍വീനര്‍ പി.ആര്‍ വസന്തകുമാറും വാര്‍ത്താസമ്മേളനത്തില്‍ അറിയിച്ചു. ഏഴ് പ്രധാന വേദികളിലും ഏഴ് ഉപവേദികളിലുമായാണ് മത്സരങ്ങള്‍. ബ്രണ്ണന്‍ ഹയര്‍ സെക്കന്‍ഡറി, ബി.ഇ.എം.പി ഹയര്‍ സെക്കന്‍ഡറി, ഗവ. ഗേള്‍സ് ഹയര്‍ സെക്കന്‍ഡറി, സെന്റ് ജോസഫ് ഹയര്‍ സെക്കന്‍ഡറി, സേക്രട് ഹാര്‍ട്ട് ഹയര്‍ സെക്കന്‍ഡറി, സ്റ്റേഡിയം ട്രഷറി ഭാഗം, പൊലിസ് സ്റ്റേഷന്‍ ഭാഗത്തും വേദികള്‍ സജ്ജീകരിക്കും.
6നു രാവിലെ 8.30ന് രജിസ്‌ട്രേഷന്‍ ആരംഭിക്കും.ഉച്ചക്ക് 12ന് ബി.ഇ.എം.പി ഹയര്‍ സെക്കന്‍ഡറി സ്‌കൂളില്‍ വിദ്യാഭ്യാസ മന്ത്രി പ്രൊഫ. ഡി രവീന്ദ്രനാഥ് ഉദ്ഘാടനം ചെയ്യും. എ.എന്‍ ഷംസീര്‍ എം.എല്‍.എ അധ്യക്ഷനാകും. നഗരസഭാ ചെയര്‍മാന്‍ സി.കെ രമേശന്‍ ലോഗോ സമ്മാനദാനം നിര്‍വഹിക്കും. എം.എല്‍.എമാരായ കെ.സി ജോസഫ്, ഇ.പി ജയരാജന്‍, അഡ്വ. സണ്ണി ജോസഫ്, ജില്ലാ പഞ്ചായത്ത് പ്രസിഡന്റ് കെ.വി സുമേഷ് വിശിഷ്ടാതിഥിയാകും. നാളെ വൈകുന്നേരം സ്റ്റേഡിയം പരിസരത്ത് വിളംബര ജാഥ. ഗവ. ഗേള്‍സ് സ്‌കൂളില്‍ ഭക്ഷണത്തിനുള്ള ഏര്‍പ്പാട് നടത്തും. ഇല ഒഴിവാക്കി ഗ്ലാസും പ്ലെയ്റ്റുമായിരുക്കും ഉപയോഗിക്കുക. പാചക വിദഗ്ധന്‍ നാരായണന്‍ മാരാര്‍ വെള്ളൂരാണ് ഭക്ഷണമൊരുക്കുന്നത്. മീഡിയാ റൂം ഇന്നു വൈകുന്നേരം ഗവ. ബ്രണ്ണന്‍ ഹയര്‍ സെക്കന്‍ഡറി സ്‌കൂളില്‍ ഉദ്ഘാടനം ചെയ്യും.
സമാപന സമ്മേളനം 10ന് ബ്രണ്ണന്‍ ഹയര്‍ സെക്കന്‍ഡറി സ്‌കൂളില്‍ മന്ത്രി കടന്നപ്പള്ളി രാമചന്ദ്രന്‍ ഉദ്ഘാടനം ചെയ്യും. എം.പിമാരായ കെ.കെ രാഗേഷ്, മുല്ലപ്പള്ളി രാമചന്ദ്രന്‍, പി.കെ ശ്രീമതി, പി കരുണാകരന്‍, എം.എല്‍.എമാരായ സി കൃഷ്ണന്‍, കെ.എം ഷാജി, ടി.വി രാജേഷ് സംബന്ധിക്കും. വാര്‍ത്താസമ്മേളനത്തില്‍ എ.കെ അബ്ദുല്‍ ലത്തീഫ്, എം വേണുഗോപാല്‍, കെ രമേശന്‍, കെ.ടി ഫ്രാന്‍സിസ് പങ്കെടുത്തു.