ലണ്ടന്‍: ഇംഗ്ലീഷ് പ്രീമിയര്‍ ലീഗില്‍ മാഞ്ചസ്റ്റര്‍ സിറ്റിയെ അവരുടെ തട്ടകത്തില്‍ തകര്‍ത്ത് ചെല്‍സി ഉജ്ജ്വല വിജയം സ്വന്തമാക്കി. ഒന്നിനെതിരേ മൂന്നു ഗോളുകള്‍ക്കാണ് ചെല്‍സിയുടെ വിജയം. ആദ്യ പകുതിയില്‍ കാഹിലിന്റെ സെല്‍ഫ് ഗോളില്‍ മാഞ്ചസ്റ്റര്‍ സിറ്റി ലീഡെടുത്തപ്പോള്‍ രണ്ടാം പകുതിയില്‍ ഡീഗോ കോസ്റ്റ, വില്ല്യന്‍, ഹസാദ് എന്നിവര്‍ ചെല്‍സിക്കായി വല ചലിപ്പിച്ചു.
മറ്റു മത്സരങ്ങളില്‍ ടോട്ടനം 5-0ത്തിനു സ്വാന്‍സീ സിറ്റയെ തകര്‍ത്തപ്പോള്‍ സണ്ടര്‍ലാന്‍ഡ് 2-1നു ലെയ്സ്റ്റര്‍ സിറ്റിയെ അട്ടിമറിച്ചു. ക്രിസ്റ്റല്‍ പാലസ്, സ്റ്റോക് സിറ്റി, വെസ്റ്റ്‌ബ്രോംവിച് ടീമുകളും വിജയിച്ചു.

ബയേണ്‍  ഒന്നാം സ്ഥാനത്ത്

മ്യൂണിക്ക്: ജര്‍മന്‍ ബുണ്ടസ് ലീഗയില്‍ ബയേണ്‍ മ്യൂണിക്ക് വീണ്ടും ഒന്നാം സ്ഥാനത്ത്. മെയ്ന്‍സിനെ 3-1നു പരാജയപ്പെടുത്തി. ഒന്നാമതുണ്ടായിരുന്നു ലെയ്പ്‌സിഗ് ബയര്‍ ലെവര്‍കൂസനുമായി 1-1നു സമനിലയില്‍ പിരിഞ്ഞതോടെയാണ് ബയേണ്‍ വീണ്ടും ഒന്നിലെത്തിയത്.