വാഷിങ്ടണ്‍: യു.എസിലെ സാന്‍ഫ്രാന്‍സിസ്‌കോയിലെ നിശാക്ലബിലുണ്ടായ വന്‍ അഗ്നിബാധയില്‍ പത്ത് പേര്‍ മരിച്ചു. 13 പേര്‍ മരിച്ചതായി സ്ഥിരീകരിക്കാത്ത റിപ്പോര്‍ട്ടുണ്ട്. നിരവധി പേരെ കാണാതായതായി പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്തു. അപകട സമയത്ത് 50 പേര്‍ ക്ലബിലുണ്ടായിരുന്നു. സംഗീതജ്ഞരും കലാകാരന്മാരും ഉള്‍പ്പെട്ട സംഘമാണിത്. കിഴക്കന്‍ ഓക്‌ലന്റ് 31 അവന്യൂവിലെ ഇരുനില കെട്ടിടത്തിലാണ് തീപിടിത്തം. പ്രാദേശിക സമയം വെള്ളിയാഴ്ച രാത്രി 11.30 ഓടെ (ഇന്ത്യന്‍ സമയം ഇന്നലെ രാത്രി 10)ഓടെയാണ് സംഭവം. 

സംഗീത പരിപാടി നടക്കുന്ന ക്ലബ് കെട്ടിടത്തിലെ രണ്ടാം നിലയിലാണ് പ്രവര്‍ത്തിച്ചിരുന്നതെന്ന് അഗ്നിശമന സേന അറിയിച്ചു. ഓക്‌ലന്റില്‍ സമീപകാലത്തുണ്ടായ ഏറ്റവും വലിയ തീപിടിത്തമാണിതെന്ന് പ്രദേശവാസികള്‍ പറഞ്ഞു. നാലു മണിക്കൂര്‍ നീണ്ട പരിശ്രമത്തിനൊടുവില്‍ തീ നിയന്ത്രണ വിധേയമാക്കി.