കാസര്‍കോട്: വിദ്യാനഗര്‍ ചെട്ടുംകുഴിയില്‍ മരമില്ലില്‍ വന്‍ തീപിടുത്തം. ഇന്നു പുലര്‍ച്ചെ ഒരു മണിയോടെയാണ് സംഭവം. അഞ്ച് യൂനിറ്റ് ഫയര്‍ഫോഴ്‌സെത്തി തീ അണക്കാന്‍ ശ്രമിച്ചെങ്കിലും എട്ടുമണിവരെ സാധിച്ചിട്ടില്ല. സലീം എന്നയാളുടെ ഉടമസ്ഥതയിലുള്ള അജ്മീരിയ മരമില്ലിനാണ് തീപിടിച്ചത്. കോടികളുടെ നഷ്ടം സംഭവിച്ചതായി കണക്കാക്കുന്നു. ഷോര്‍ട്ട് സര്‍ക്യൂട്ടാണ് തീപിടിത്തത്തിന് കാരണമെന്നാണ് സംശയിക്കുന്നത്. രാത്രി ഒരു മണിയോടെ നാട്ടുകാരാണ് മില്ലിനകത്ത് നിന്നും തീയും പുകയും ഉയരുന്നത് കണ്ടത്. നാട്ടുകാര്‍ വിവരമറിയിച്ചതിനെ തുടര്‍ന്ന് പൊലിസും ഫയര്‍ഫോഴ്‌സും എത്തി തീ അണച്ചു കൊണ്ടിരിക്കുകയാണ്. കാസര്‍കോട് നിന്നും മൂന്നും, കാഞ്ഞങ്ങാട്, ഉപ്പള സ്‌റ്റേഷനുകളില്‍ ഓരോന്ന് വീതം യൂനിറ്റും ചേര്‍ന്നാണ് തീ അണക്കാനുള്ള ശ്രമം നടത്തിവരുന്നത്.