വടക്കാഞ്ചേരി: ഓട്ടുപാറ നഗരഹൃദയത്തില്‍ വ്യാപാര സ്ഥാപനത്തിലേക്ക് ഓടിക്കയറിയ തെരുവ് നായ കടയുടമയായ വയോധികനെ കടിച്ച പരുക്കേല്‍പ്പിച്ചു. ഇടത് കാലില്‍ സാരമായി പരുക്കേറ്റ കടയുടമയെ വടക്കാഞ്ചേരി ജില്ലാ ആശുപത്രിയില്‍ പ്രാഥമിക ചികിത്സ നല്‍കി. ആക്ട്‌സ് പ്രവര്‍ത്തകരെത്തി മുളങ്കുന്നത്ത് കാവ് മെഡിക്കല്‍ കോളജ് ആശുപത്രിയിലേക്ക് മാറ്റി. ഓട്ടുപാറ സലഫി മസ്ജിദിന് സമീപം ഉണക്കമീന്‍ വ്യാപാരം നടത്തുന്ന കിണറാമാക്കല്‍ അബൂബക്കര്‍ (60)നാണ് കടിയേറ്റത്. ഇന്നലെ വൈകിട്ട് 7.30 ഓടെയാണ് സംഭവം കടയില്‍ ഇരിക്കുന്നതിനിടെ ഓടിയെത്തിയ തെരുവ് നായ അബൂബക്കറിനെ കടിച്ച് കുടയുകയായിരുന്നു.
കരച്ചില്‍ കേട്ട് ഓടി കൂടിയെത്തിയ നാട്ടുകാരാണ് വയോധികനെ നായയില്‍ നിന്ന് രക്ഷിച്ചത്. മേഖലയില്‍ വലിയ തോതില്‍ തെരുവ് നായ് ശല്യം ഉണ്ടാകുന്നതായി നേരത്തെ തന്നെ വ്യാപക പരാതിയുണ്ട്.