തിരൂരങ്ങാടി: ഇസ്‌ലാം സ്വീകരിച്ചതിനെ തുടര്‍ന്നു കൊടിഞ്ഞിയില്‍ ഫൈസല്‍ വധിക്കപ്പെട്ട സംഭവത്തില്‍ പൊലിസിന്റെ ഒത്തുകളി മറനീക്കി പുറത്തേക്ക്. സംഭവത്തില്‍ പിടിക്കപ്പെട്ടതും പിടിക്കാനുള്ളതുമായ ആര്‍.എസ്.എസ് പ്രവര്‍ത്തകരെ രക്ഷിച്ചെടുക്കാനുള്ള പൊലിസിന്റെയും ആര്‍.എസ്.എസിന്റെയും ഒത്തുകളിയാണ് പുറത്താകുന്നത്.
ഫൈസലിനെ വധിക്കാനുള്ള ഗൂഢാലോചന നടത്തിയ നന്നമ്പ്ര മേലേപ്പുറം വിദ്യാനികേതന്‍ സ്‌കൂളിനെതിരേ ഇതുവരെ നടപടിയായിട്ടില്ല. ഈ വിഷയത്തില്‍ അന്വേഷണ ഉദ്യോഗസ്ഥര്‍ ഇപ്പോഴും മൗനം പാലിക്കുകയാണ്. സ്‌കൂള്‍ അടച്ചുപൂട്ടണമെന്ന ആവശ്യം ശക്തമായിട്ടും സ്‌കൂളിനെതിരേ വേണ്ടവിധം അന്വേഷണം നടത്താന്‍പോലും പൊലിസ് തയാറായിട്ടില്ല. ഫൈസലിനെ വധിക്കാന്‍ ഗൂഢാലോചന നടത്തിയത് വിദ്യാനികേതനില്‍വച്ചായിരുന്നെന്നു കേസില്‍ പിടിക്കപ്പെട്ടു ജയിലില്‍ കഴിയുന്ന ഗൂഢാലോചനാ പ്രതികള്‍ പൊലിസിനോട് സമ്മതിച്ചിരുന്നു.
എന്നാല്‍, സ്‌കൂളിനെതിരേയോ അതിന്റെ ഭാരവാഹികള്‍ക്കെതിരേയോ അന്വേഷണം നടത്താനോ നടപടി സ്വീകരിക്കാനോ പൊലിസ് തയാറാകാത്തത് വലിയ പ്രതിഷേധത്തിനിടയാക്കിയിട്ടുണ്ട്. സ്‌കൂള്‍ മാനേജരുടെ അറിവോടെയാണ് ഗൂഢാലോചന നടന്നതെന്നു ബോധ്യമായിട്ടും ഇയാളെ വേണ്ടവിധം ചോദ്യംചെയ്യുന്ന കാര്യത്തില്‍ അന്വേഷണ ഉദ്യോഗസ്ഥര്‍ മടിച്ചുനില്‍ക്കുകയാണ്.
തീവ്ര ഹിന്ദുത്വ നിലപാടുള്ള അധ്യാപകര്‍ പഠിപ്പിക്കുന്ന ഈ സ്‌കൂളില്‍ ഇതേ നിലപാടുള്ള ആളുകളുടെ മക്കളാണ് പഠിക്കുന്നത്. നാട്ടില്‍ അസഹിഷ്ണുത വളര്‍ത്തുന്ന തരത്തില്‍ കുട്ടികളില്‍ വര്‍ഗീയത കുത്തിവയ്ക്കുന്നതായും സ്‌കൂളിന്റെ മറവില്‍ ആര്‍.എസ്.എസ് രാത്രികാലങ്ങളില്‍ ആയുധ പരിശീലം നടത്തുന്നതായും നാട്ടുകാര്‍ക്ക് നേരത്തെതന്നെ പരാതിയുണ്ടായിരുന്നു. വര്‍ഷങ്ങളായി ആര്‍.എസ്.എസിന്റെ ശാഖയും ഈ വിദ്യാലയത്തിലാണ് നടക്കുന്നതെന്നു നാട്ടുകാര്‍ പറയുന്നു.
രാത്രിസമയങ്ങളില്‍ വെള്ളിയാമ്പുറം, തട്ടത്തലം, തെയ്യാല, കൊടിഞ്ഞി പ്രദേശങ്ങളിലെ സംഘ്പരിവാര്‍ പ്രവര്‍ത്തകര്‍ ഇവിടെ പരിശീലത്തിനെത്തുന്നുണ്ട്. വെള്ളിയാമ്പുറത്ത് അങ്ങാടിക്കു സമീപമുള്ള ക്ഷേത്രപരിസരത്തു സ്ത്രീകള്‍ക്കും കുട്ടികള്‍ക്കും വെവ്വേറെ ശാഖകള്‍ നടക്കുന്നതായും പലസമയങ്ങളിലും ഇവിടെ അപരിചിതരെ കാണുന്നതായും നാട്ടുകാര്‍ പറയുന്നു.
അന്വേഷണ ഉദ്യോഗസ്ഥനടക്കം കേസില്‍ ആര്‍.എസ്.എസിനെ വഴിവിട്ടു സഹായിക്കുന്നതായി നേരത്തെ ആരോപണമുണ്ടായിരുന്നു. കേസില്‍ എട്ട് ആര്‍.എസ്.എസ് പ്രവര്‍ത്തകരെ അറസ്റ്റ് ചെയ്തിട്ടും അവരുടെ വിവരങ്ങളും വിലാസങ്ങളും ഈ ഉദ്യോഗസ്ഥന്‍ മറച്ചുവയ്ക്കുകയാണുണ്ടായത്. ഫൈസല്‍ വധക്കേസില്‍ അന്വേഷണം വഴിമുട്ടുന്നതായും വഴിതിരിച്ചുവിടുന്നതായും ആരോപണം നിലനില്‍ക്കേ, സംഭവത്തില്‍ പ്രതിഷേധത്തിനും ചൂടുപിടിക്കുകയാണ്.ട