മനാമ: പവിത്രമായ ബറാഅത്ത് ദിനം കേരളത്തോടൊപ്പം ഗള്‍ഫ് നാടുകളിലും നാളെ(ഞായറാഴ്ച) ആചരിക്കുകയാണ്. ഒമാന്‍ അടക്കമുള്ള മുഴുവന്‍ ഗള്‍ഫ് രാഷ്ട്രങ്ങളിലും ശനിയാഴ്ച അസ്തമിച്ച രാത്രിയാണ് ബറാഅത്ത് രാവ്.

ബറാഅത്ത് ദിനമായ ഞായറാഴ്ച പകലില്‍ കേരളത്തിലെ വിശ്വാസികളോടൊപ്പം ഗള്‍ഫ് നാടുകളിലുള്ള വിശ്വാസികളും പ്രത്യേകമായ ഐഛിക വൃതാനുഷ്ഠാനത്തിലും (സുന്നത്ത് നോമ്പിലും) പങ്കു ചേരും.

വിശുദ്ധ റമസാന്‍ മാസത്തിനു മുന്നോടിയായി എത്തുന്ന പവിത്രമായ രാവാണ് ശഅ്ബാന്‍ 15ന്റെ രാവായ ബറാഅത്ത് രാവ്. ലൈലത്തുല്‍ റഹ് മ(കാരുണ്ണ്യ രാത്രി), ലൈലത്തുല്‍ മുബാറക(അനുഗ്രഹീത രാത്രി), ലൈലത്തു സ്വക്ക്(വിധി തീര്‍പ്പു രാത്രി), ലൈലത്തുല്‍ ബറാഅ(വിമോചന രാത്രി) എന്നിങ്ങിനെ വിവിധ നാമങ്ങളില്‍ അറിയപ്പെടുന്ന ഈ രാത്രിയുടെ മഹത്വവും പ്രാധാന്യവും പണ്ഢിതന്മാര്‍ വിശദീകരിച്ചിട്ടുണ്ട്. ഈ രാത്രിയില്‍ ദീര്‍ഘായുസ്സ്, ഭക്ഷണ വിശാലത, പാരത്രിക മോക്ഷം എന്നിവ ലക്ഷ്യമാക്കി വിശുദ്ധ ഖുര്‍ആനിലെ സൂറത്ത് യാസീന്‍ മൂന്നു തവണ പാരായണം ചെയ്യലും വിവിധ ദിക്ര്!ദുആകള്‍ അധികരിപ്പിക്കലും വിശ്വാസികള്‍ ക്കിടയില്‍ പതിവുണ്ട്.

കൂടാതെ മധുര പലഹാരങ്ങള്‍ ഉണ്ടാക്കിയും അവ പരസ്പരം വിതരണം ചെയ്തും കുടുംബാഗങ്ങളോട് കൂടുതല്‍ കാരുണ്ണ്യം കാണിച്ചും മറ്റുള്ളവര്‍ക്കിടയില്‍ സന്തോഷം പങ്കിട്ടും ഈ രാവും പകലും വിശ്വാസികള്‍ സജീവമാക്കും. നാട്ടിലെ ഗൃഹാതുര സ്മരണകള്‍ അയവിറക്കി ഗള്‍ഫിലെ പ്രവാസികുടംബങ്ങളും ഇത്തരം കാര്യങ്ങള്‍ ശ്രദ്ധിക്കുന്നവരാണ്.

കഴിഞ്ഞ വെള്ളിയാഴ്ച മിക്ക പള്ളികളിലെ ജുമുഅ ഖുതുബകളിലും ശഅ്ബാന്‍ മാസത്തിന്റെ പവിത്രതയും മഹത്വവും ഓര്‍മ്മപ്പെടുത്തിയിരുന്നു. കൂടാതെ, ശഅ്ബാന്‍ 15 ദിനാചരണത്തോടനുബന്ധിച്ച് ഗള്‍ഫ് രാഷട്രങ്ങളിലെ വിവിധ മത സംഘടനകളുടെയും പ്രവാസി സംഘടനകളുടെയും കീഴില്‍ പ്രത്യേകമായ പ്രഭാഷണ പരിപാടികളും പ്രാര്‍ത്ഥനാ സദസ്സുകളും നടക്കുന്നുണ്ട്.

സമസ്ത ബഹ്‌റൈന്‍ കേന്ദ്ര കമ്മറ്റി സംഘടിപ്പിക്കുന്ന ബറാഅത്ത് ദിന പ്രഭാഷണം രാത്രി 8.30ന് മനാമ ഗോള്‍ഡ് സിറ്റിയിലെ സമസ്ത മദ്‌റസാ ഓഡിറ്റോറിയത്തില്‍ നടക്കുമെന്ന് ബന്ധപ്പെട്ടവര്‍ അറിയിച്ചിട്ടുണ്ട്. ഇതോടനുബന്ധിച്ച് നടക്കുന്ന പ്രാര്‍ത്ഥനാ സദസ്സിന് സമസ്ത ബഹ്‌റൈന്‍ പ്രസിഡന്റ് സയ്യിദ് ഫഖ്‌റുദ്ധീന്‍ കോയ തങ്ങള്‍ നേതൃത്വം നല്‍കും.

ഇത് കൂടാതെ ബഹ്‌റൈനിലെ വിവിധ ഏരിയാ കേന്ദ്രങ്ങളിലും പ്രത്യേക ബറാഅത്ത് പ്രഭാഷണപ്രാര്‍ത്ഥനാ ചടങ്ങുകള്‍ നടക്കും. ഇതര ഗള്‍ഫ് രാഷ്ട്രങ്ങളിലും സമസ്ത, ഇസ്ലാമിക് സെന്റര്‍, സുന്നി സെന്റര്‍, ഐസിഎഫ് തുടങ്ങിയ വിവിധ സംഘടനകളുടെയും പോഷക ഘടകങ്ങളുടെയും നേതൃത്വത്തില്‍ ബറാഅത്ത് ദിനത്തോടുബന്ധിച്ച് പ്രത്യേക ചടങ്ങുകള്‍ സംഘടിപ്പിച്ചിട്ടുണ്ട്.