രാമപുരം: കോട്ടമല സംരക്ഷണിക്കുന്നതിന് വേണ്ടി സുപ്രീം കോടതി ചീഫ് ജസ്റ്റിസ് മുന്‍പാകെ സമര്‍പ്പിക്കുന്നതിനുള്ള ഭീമഹര്‍ജിയില്‍ രാമപുരത്തിന്റെ മുത്തച്ചന്‍ നൂറ്റിപതിനൊന്ന് വയസുള്ള പത്മനാഭ മാരാരും അണിചേര്‍ന്നു.
സമരസമിതി പ്രവര്‍ത്തകരും നാട്ടുകാരും എത്തിയപ്പോള്‍ പ്രകൃതി സ്‌നേഹിയായ ഇദ്ദേഹവും നിറഞ്ഞ സന്തോഷത്തോടെ ഇതില്‍ പങ്കാളിയാവുകയായിരുന്നു. നാലമ്പലങ്ങളിലെ രാമപുരം ശ്രീരാമസ്വാമി ക്ഷേത്രത്തില്‍ കഴിഞ്ഞ നൂറ്റിമൂന്ന് വര്‍ഷമായി സോപാന സംഗീതം ആലപിച്ചുവരുന്ന വ്യക്തിയാണ് മാരാര്‍. ഒരു രൂപയും ഒപ്പും നല്‍കിയ പത്മനാഭ മാരാര്‍ നാടിനെ സംരക്ഷിക്കുവാന്‍ ശക്തമായി പോരാടണമെന്നും, മനസ്സുകൊണ്ട് ഞാനും നിങ്ങളോടൊപ്പമുണ്ടെന്നും സമരക്കാരോട് പറഞ്ഞു. ഇന്നലെ രാവിലെ മുതല്‍ വാര്‍ഡ് മെമ്പര്‍ മാരുടെയും, സമരസമിതി പ്രവര്‍ത്തകരുടെയും, നാട്ടുകാരുടെയും നേതൃത്വത്തില്‍ വിവിധ സ്‌ക്വാഡുകളായി തിരിഞ്ഞ് പത്ത് മുതല്‍ പതിനെട്ട് വരെയുള്ള വാര്‍ഡുകളിലെ വീടുകളില്‍ കയറി ഒപ്പുശേഖരണം നടത്തി. ഇന്ന് 1 മുതല്‍ പത്ത് വരെയുളള വാര്‍ഡുകളില്‍ ഒപ്പുശേഖരണം നടത്തും. രാമപുരം പഞ്ചായത്തിനൊപ്പം കടനാട്, പുറപ്പുഴ പഞ്ചായത്തുകളിലും ഒപ്പുശേഖരണം നടന്നുവരികയാണ്. ജനങ്ങളില്‍ നിന്നും ആവേശകരമായ പ്രതികരണമാണ് ഒപ്പും ഒരു രൂപയും കാമ്പയിന് ലഭിച്ചുകൊണ്ടിരിക്കുന്നത്.
വാര്‍ഡുകളില്‍ അതാത് പ്രദേശത്തെ സ്ത്രീകളും കുട്ടികളും ഉള്‍പ്പെടെയുള്ള നിരവധി ആളുകള്‍ സജീവമായി ഒപ്പുശേഖരണത്തില്‍ പങ്കാളികളാകുന്നുണ്ട്. പ്രകൃതി സ്‌നേഹികളായ നിരവധി വ്യക്തികളും, സ്ഥാപനങ്ങളും സമരക്കാരെ സഹായിക്കുവാന്‍ ഇതിനോടകം മുന്‍പോട്ട് വന്നിട്ടുണ്ട്.