കൊച്ചി: ഈ മധ്യവേനലവധിക്ക് സംസ്ഥാനത്തെ പൊതുവിദ്യാലയങ്ങളിലെ എട്ടു മുതല്‍ 12 വരെയുള്ള ക്ലാസുകള്‍ ഡിജിറ്റലൈസ് ചെയ്യുമെന്ന് സംസ്ഥാന ധനമന്ത്രി ഡോ.ടി.എം. തോമസ് ഐസക്. പൊതു വിദ്യാഭ്യാസ രംഗത്ത് നടപ്പാക്കാന്‍ പോകുന്ന മാറ്റത്തിന്റെ തുടക്കമാണിതെന്നും അദ്ദേഹം കൂട്ടിച്ചേര്‍ത്തു. കേരള സ്‌കൂള്‍ ടീച്ചേഴ്‌സ് അസോസിയേഷന്‍ സംഘടിപ്പിച്ച വിദ്യാഭ്യാസ സംഗമം ഉദ്ഘാടനം ചെയ്യുകയായിരുന്നു അദ്ദേഹം.
ക്ലാസ് മുറികളില്‍ എല്‍.സി.ഡി പ്രൊജക്ടര്‍ അടക്കമുള്ള സൗകര്യങ്ങള്‍ ഏര്‍പ്പെടുത്തും. യു. പി, പ്രൈമറി സ്‌കൂളുകള്‍ക്ക് ലാബുകളടക്കമുള്ള സംവിധാനങ്ങള്‍ അടുത്തഘട്ടമായി നടപ്പാക്കുമെന്നും മന്ത്രി പറഞ്ഞു. പൊതുജനങ്ങളും പി.ടി.എയും സംവിധാനങ്ങളൊരുക്കാന്‍ സഹകരിക്കണം. സാമ്പത്തിക രംഗത്തെ പുരോഗതിക്കൊപ്പം കേരളത്തിലെ പൊതു വിദ്യാഭ്യാസ രംഗവും ശക്തിപ്പെടണം. എന്തു വിലകൊടുത്തും പൊതുവിദ്യാഭ്യാസത്തെ സംരക്ഷിക്കും. ഇതിന് ചെലവ് എത്രയെന്നത് പ്രശ്‌നമല്ലെന്നും മന്ത്രി പറഞ്ഞു. വിദ്യാഭ്യാസമന്ത്രി പ്രൊഫ. സി. രവീന്ദ്രനാഥ്, സംഘാടക സമിതി ചെയര്‍മാന്‍ പി. രാജീവ്, പൊതുവിദ്യാഭ്യാസ ഡയറക്ടര്‍ കെ. വി. മോഹന്‍കുമാര്‍, ഡോ. ജെ. പ്രസാദ്, ഡോ. പി. എ. ഫാത്തിമ തുടങ്ങിയവര്‍ പ്രസംഗിച്ചു.