തേഞ്ഞിപ്പലം: കാസര്‍കോട് രണ്ടു വര്‍ഷത്തിനു ശേഷം വീണ്ടും മെഡല്‍ പട്ടികയില്‍ ഇടം നേടി. സീനിയര്‍ പെണ്‍കുട്ടികളുടെ ഷോട്പുട്ടില്‍ തോമാപുരം സെന്റ്‌തോമസ് എച്ച്.എസ്.എസിലെ പ്ലസ്ടു വിദ്യാര്‍ഥിനി ഡോണ ജോയ് ആണ് മെഡല്‍ നേടിയത്. വെള്ളിയാണ് ഡോണ നേടിയത്. നേരിയ വ്യത്യാസത്തിലായിരുന്നു ഡോണക്ക് സ്വര്‍ണം നഷ്ടമായത്.
സ്വര്‍ണം നേടിയ തൃശൂരിന്റെ മരിയ തോമസ് 9.91 മീറ്ററാണ് എറിഞ്ഞത്. ഡോണയുടെ നേട്ടം 9.90 മീറ്ററിലൊതുങ്ങി. 2014ല്‍ ജൂനിയര്‍ വിഭാഗം ഷോട്പുട്ടില്‍ ഡോണ വെങ്കലം നേടിയിരുന്നു. സബ്ജില്ലാ തലത്തിലെ 10.50 മീറ്റര്‍ ദൂരം ആവര്‍ത്തിക്കാനായില്ലെങ്കിലും ജില്ലയുടെ ആദ്യ മെഡല്‍ തന്റെ അക്കൗണ്ട് വഴിയായതില്‍ സന്തോഷമുണ്ടെന്നു ഡോണ പറഞ്ഞു.