നാദാപുരം: മാവോയിസ്റ്റ് ഭീഷണിയെത്തുടര്‍ന്ന് ജില്ലയിലെ നാലു പൊലിസ് സ്റ്റേഷനുകള്‍ക്ക് ഏര്‍പ്പെടുത്തിയ സായുധസേനയുടേ പ്രത്യേക സുരക്ഷ പിന്‍വലിച്ചു. വളയം, തൊട്ടില്‍പ്പാലം, കൂരാച്ചുണ്ട്, പെരുവണ്ണാമൂഴി എന്നി പൊലിസ് സ്റ്റേഷനുകള്‍ക്ക് മാവോയിസ്റ്റ് ഭീഷണിയുണ്ടെന്ന വിവരത്തിന്റെ അടിസ്ഥാനത്തില്‍ കഴിഞ്ഞ സര്‍ക്കാറിന്റെ കാലത്താണ് പ്രത്യേക സുരക്ഷ ഏര്‍പ്പെടുത്തിയത്.
കേരള പൊലിസിന്റെ പ്രത്യേക പരിശീലനം നേടിയ സംഘത്തെയാണ് ഇതിനായി നിയോഗിച്ചിരുന്നത്. കഴിഞ്ഞ വര്‍ഷം തൊട്ടില്‍പ്പാലത്തെ ചൂരണിമലയിലെ പാറമടയില്‍ മണ്ണുമാന്തി യന്ത്രം തീവച്ച് നശിപ്പിച്ചതിനു മാവോയിസ്റ്റ് സംഘത്തിനെതിരേ കേസെടുത്തിരുന്നു. വിലങ്ങാട്ടെ പന്ന്യന്നൂര്‍, വായാട്, പാനോം കോളനികളിലും മാവോയിസ്റ്റ് സാന്നിധ്യം സ്ഥിരീകരിച്ചിരുന്നു. മാവോയിസ്റ്റ് നേതാവ് രൂപേഷിന്റെ നേതൃത്വത്തില്‍ ഈ കോളനികളില്‍ സംഘത്തില്‍പ്പെട്ടവര്‍ ആയുധവുമായി എത്തുകയും കോളനിവാസികള്‍ക്കിടയില്‍ മാവോയിസം പ്രചരിപ്പിക്കുകയും ചെയ്തിരുന്നു.
മറ്റു കേസുകളില്‍ ഇയാളെ അറസ്റ്റ് ചെയ്തപ്പോള്‍ വിലങ്ങാട് കോളനിയിലും രൂപേഷിനെ കൊണ്ടുവന്നു പൊലിസ് തെളിവെടുപ്പ് നടത്തി. ഇവിടങ്ങളില്‍ മാവോയിസ്റ്റ് സാന്നിധ്യം ശക്തമാണെന്ന റിപ്പോര്‍ട്ടിനെ തുടര്‍ന്നാണ് നേരത്തെ സുരക്ഷ ശക്തമാക്കിയത്. ഇതേത്തുടര്‍ന്ന് കണ്ണവം വനമേഖലയോട് ചേര്‍ന്ന ഉള്‍ക്കാടുകളില്‍ ഇവര്‍ക്കായി തണ്ടര്‍ ബോള്‍ട്ടടക്കമുള്ള സായുധ സേനയുടെ നേതൃത്വത്തില്‍ ദിവസങ്ങള്‍ നീണ്ട തെരച്ചില്‍ നടത്തിയിരുന്നു.
ഭീഷണി മുന്‍ നിര്‍ത്തി തൊട്ടടുത്ത പൊലിസ് സ്റ്റേഷനുകള്‍ക്ക് രാത്രിയും പകലും ശക്തമായ കാവലാണ് ഏര്‍പ്പെടുത്തിയിരുന്നത്.
എന്നാല്‍ പൊലിസ് സ്റ്റേഷനുകള്‍ക്ക് നേരത്തെ എര്‍പ്പെടുത്തിയിരുന്ന പ്രത്യേക സുരക്ഷ അടുത്ത കാലത്തായി പൂര്‍ണമായും പിന്‍വലിച്ചിരിക്കുകയാണ്.