കൂത്തുപറമ്പ്: കണ്ണവം തൊടീക്കളത്തെ സി.പി.എം നേതാവ് ജി പവിത്രനെ കൊലപ്പെടുത്തിയ കേസില്‍ ആര്‍.എസ്.എസ് പ്രവര്‍ത്തകന്‍ മാഹി ചെമ്പ്രയിലെ ഇ സുബീഷി(30)നെ കൊലപാതകം നടന്ന സ്ഥലത്തെത്തിച്ച് തെളിവെടുപ്പു നടത്തി. ഇന്നലെ ഉച്ചയ്ക്ക് ഒന്നരയോടെയാണ് തലശ്ശേരി ഡി.വൈ.എസ്.പി പ്രിന്‍സ് അബ്രഹാമിന്റെ നേതൃത്വത്തില്‍ പൊലിസ് സംഘം തൊടീക്കളത്തെ റേഷന്‍ കടയ്ക്കു സമീപമെത്തിച്ചു തെളിവെടുത്തത്. പടുവിലായിയിലെ സി.പി.എം നേതാവ് കെ മോഹനനെ കൊലപ്പെടുത്തിയ കേസില്‍ അറസ്റ്റിലായപ്പോഴാണ് പവിത്രന്‍ വധക്കേസിലും കൂടി തനിക്കും മറ്റു ആര്‍.എസ്.എസ് പ്രവര്‍ത്തകര്‍ക്കും പങ്കുണ്ടെന്ന് സുബീഷ് കുറ്റസമ്മതമൊഴി നല്‍കിയത്. ഇതേത്തുടര്‍ന്നായിരുന്നു സുബീഷിനെ പവിത്രന്‍ വധക്കേസിലും ഉള്‍പ്പെടുത്തി റിമാന്‍ഡ് ചെയ്തത്. റിമാന്‍ഡിലായിരിക്കെ കോടതിയുടെ അനുമതിയോടെ പൊലിസ് പവിത്രന്‍ വധക്കേസിലെ തെളിവെടുപ്പിനായി കസ്റ്റഡിയില്‍ വാങ്ങുകയായിരുന്നു. സുബീഷിനെ കൂടാതെ ആര്‍.എസ്.എസ് പ്രവര്‍ത്തകരായ മറ്റു ആറു പേരെക്കൂടി പ്രതി ചേര്‍ത്താണ് പൊലിസ് ഈ കേസില്‍ പുനരന്വേഷണം നടത്തുന്നത്. 2009 മാര്‍ച്ച് 27നായിരുന്നു പവിത്രന്‍ കൊല്ലപ്പെട്ടത്. കൂത്തുപറമ്പ് സി.ഐ കെ.പി സുരേഷ് ബാബു, എസ്.ഐ കെ.ജെ വിനോയി, കണ്ണവം എസ്.ഐ കെ.വി ഗണേശന്‍ എന്നിവരും തെളിവെടുപ്പിനെത്തിയ സംഘത്തിലുണ്ടായിരുന്നു.