വിദ്യാനഗര്‍: ഉളിയത്തടുക്കക്ക് സമീപം എസ്.പി നഗറില്‍ ക്വാര്‍ട്ടേഴ്‌സിന് മുന്നില്‍ നിര്‍ത്തിയിട്ട ഓട്ടോറിക്ഷ കത്തിച്ച നിലയില്‍. ക്വാര്‍ട്ടേഴ്‌സിലെ താമസക്കാരന്‍ പത്മനാഭ(45)യുടെ ഉടമസ്ഥതയിലുള്ള കെ.എല്‍. 14 എന്‍. 3162 നമ്പര്‍ ആപ്പെ ഓട്ടോറിക്ഷയാണ് കത്തിച്ചത്. ഇന്നലെ പുലര്‍ച്ചെയാണ് അജ്ഞാതര്‍ തീയിട്ട് നശിപ്പിച്ചത്.
പത്മനാഭയും കുടുംബവും താമസിക്കുന്ന എസ്.പി നഗര്‍ ഫത്തഹ് പള്ളിക്ക് സമീപത്തെ ക്വാര്‍ട്ടേഴ്‌സിന് മുന്നിലായിരുന്നു ഓട്ടോ നിര്‍ത്തിയിട്ടിരുന്നത്. ഇന്നലെ പുലര്‍ച്ചെ പന്ത്രണ്ടരയോടെ പുറത്ത് വെളിച്ചം കണ്ട് നോക്കിയപ്പോഴാണ് ഓട്ടോ കത്തുന്നതായി കണ്ടത്. ഉടന്‍ വെള്ളമൊഴിച്ച് കെടുത്തുമ്പോഴേക്കും പൂര്‍ണമായും കത്തി നശിച്ചിരുന്നു. വിദ്യാനഗര്‍ പൊലിസില്‍ പരാതി നല്‍കി. ഓട്ടോറിക്ഷക്ക് തീവെച്ചതില്‍ പ്രതിഷേധിച്ച് ഉച്ചവരെ ഉളിയത്തടുക്കയില്‍ ഓട്ടോ ഡ്രൈവര്‍മാര്‍ ഹാര്‍ത്താലാചരിച്ചു.