കൊല്ലം: നബിദിനാഘോഷവും ചെറുകുഞ്ഞിക്കോയ തങ്ങള്‍ അല്‍ ഹൈദ്രൂസിയുടെ ആണ്ടുനേര്‍ച്ചയും നാളെ മുതല്‍ എട്ടുവെ ശാസ്താംകോട്ട റെയില്‍വേ സ്‌റ്റേഷന് സമീപം നടക്കുമെന്ന് സംഘാടകര്‍ വാര്‍ത്താസമ്മേളനത്തില്‍ അറിയിച്ചു. സൗജന്യ മെഡിക്കല്‍ ക്യാംപ്, ബുര്‍ദ്ദാ മജ്്‌ലിസ്, സീറാ പാരായണം, മതപ്രഭാഷണം, ജലാലിയ റാത്തീബ്, ദുആ സമ്മേളനം, ധനസഹായ വിതരണം, അന്നദാനം എന്നിവ ആണ്ടുനേര്‍ച്ചയോടനുബന്ധിച്ച് നടക്കും.
ഇന്ന് വൈകീട്ട് അഞ്ചിന് മൗലൂദ് പാരായണത്തിന് ഷംസുദീന്‍ നഈമി നേതൃത്വം നല്‍കും. രാത്രി ഏഴിന് ബദ്ര്‍ യുദ്ധം പ്രസക്തഭാഗം എന്ന വിഷയത്തില്‍ പി എസ് എം അബു മുഹമ്മദ് ബാദുഷ സീറാ പാരായണം നടത്തും. നാളെ രാവിലെ ഒമ്പതിന് സൗജന്യ മെഡിക്കല്‍ ക്യാംപിന് ഡോ.മുഹമ്മദ് സാദിഖ് നേതൃത്വം നല്‍കും. രാത്രി ഏഴിന് ബുര്‍ദാ മജ്‌ലിസിന് അബ്ദുള്‍ സലാം മഹ്‌ളരി, മുഹമ്മദ് റഫ്ശാന്‍ അമാനി എന്നിവര്‍ നേതൃത്വം നല്‍കും. എട്ടിന് രാവിലെ 8.30ന് സമാപന ദുആ സമ്മേളനം എസ് എം ആര്‍ തങ്ങള്‍ മൂവാറ്റുപുഴ ഉദ്ഘാടനം ചെയ്യും. കടയ്ക്കല്‍ അബ്ദുല്‍ അസീസ് മൗലവി അനുസ്മരണ പ്രഭാഷണം നടത്തും.
ഹസന്‍ അഷ്‌റഫി മുഖ്യപ്രഭാഷണം നടത്തും. ചികില്‍സാ ധനസഹായ വിതരണം കോവൂര്‍ കുഞ്ഞുമോന്‍ എംഎല്‍എ നിര്‍വഹിക്കും. ഹാഷിം ജിഫ്രി തങ്ങള്‍ മുഖ്യാതിഥിയായിരിക്കും.സംഘാടക സമിതി ഭാരവാഹികളായ അബ്ദുല്‍ റഷീദ് മുസലിയാര്‍ ശങ്കരമംഗലം, മുബാറക് ഫാളിലി കൊട്ടുകാട്, അബ്ദുള്‍ ഹക്കീം തങ്ങള്‍, അബ്ദുള്‍ ലത്തീഫ് മഹ്‌ളരി, കൊല്ലൂര്‍വിള കെ അബ്ദുള്‍ കലാം എന്നിവര്‍ വാര്‍ത്താസമ്മേളനത്തില്‍ പങ്കെടുത്തു.