ചെന്നൈ: ഇനിയില്ല ആ കരുതലും സ്‌നേഹവും. അണമുറിയാതെ മറീനാ ബീച്ചിലേക്കൊഴുകിയ ജനപ്രവാഹം പകരം വയ്ക്കാനില്ലാത്ത സ്‌നേഹത്തിന്റെ ഉത്തമ ഉദാഹരണമായിരുന്നു.

വൈകിട്ട് 6.04 നു ചന്ദനത്തടിയില്‍ തീര്‍ത്ത പേടകത്തില്‍ മൃതദേഹം അടക്കം ചെയ്തു. തോഴി ശശികലയാണ് അന്ത്യകര്‍മങ്ങള്‍ ചെയ്തത്.

താന്‍ ജീവനുതുല്യം സ്‌നേഹിച്ച അണ്ണായുടെ അന്ത്യവിശ്രമസ്ഥലത്തു തന്നെ ഇനി ജയയും നിത്യനിദ്രയില്‍.

രാഷ്ട്രപതി, പ്രധാനമന്ത്രി, അയല്‍ സംസ്ഥാന മുഖ്യമന്ത്രിമാര്‍ തമിഴ്‌നാട് മുഖ്യമന്ത്രി ഒ പനീര്‍സെല്‍വം, സംസ്ഥാന മന്ത്രിമാര്‍, രാഷ്ട്രീയ- സാംസ്‌കാരിക നായകര്‍ സംസ്‌കാര ചടങ്ങുകളില്‍ പങ്കെടുക്കാന്‍ മറീനാ ബീച്ചില്‍ എത്തിയിരുന്നു.

തങ്ങളെ ജീവനുതുല്യം സ്‌നേഹിച്ച അമ്മയ്ക്ക് അവസാനമായി നല്‍കാന്‍ ഈ സ്‌നേഹം മാത്രമേയുള്ളു എന്ന തമിഴകത്തിന്റെ വികാരം വഴിനീളെ ഒഴുകുകയായിരുന്നു.

സാധാരണക്കാരിയായ നേതാവല്ല, സാധാരണക്കാരുടെ നേതാവായിരുന്നു തമിഴകത്തിന്റെ പുരട്ചിത്തലൈവി. ഇനി ആ നക്ഷത്രം മണ്ണിലുറങ്ങും. മനസില്‍ മായാത്ത ഒരുപിടി ഓര്‍മകള്‍ സൂക്ഷിച്ച് തമിഴകവും.

നേരത്തെ പൊതുദര്‍ശനത്തിനു വച്ചിരുന്ന രാജാജി ഹാളില്‍നിന്ന് വിലാപയാത്രയായി ഭൗതികശരീരം വൈകുന്നേരം അഞ്ചരയോടെ മറീന ബീച്ചില്‍ എത്തിച്ചു. പതിനായിരങ്ങളാണ് വിലാപയാത്രയില്‍ പങ്കെടുത്തത്. നേരത്തെ പറഞ്ഞതിലും ഒന്നര മണിക്കൂര്‍ വൈകിയാണ് ചടങ്ങുകള്‍ തുടങ്ങിയത്.

തമിഴകത്തിന്റെ തലൈവി യാത്രയാകുന്നു; ഇടനെഞ്ചു തകര്‍ന്ന് തമിഴ്മക്കള്‍