ചെന്നൈ: രാജാജി ഹാളില്‍ നിന്ന് വിലാപയാത്രയായി ജയലളിതയുടെ ഭൗതികശരീരം അന്ത്യവിശ്രമത്തിനായി വെറും ഒരു കിലോമീറ്റര്‍ മാത്രം അകലെയുള്ള മറീന ബീച്ചിലെത്തിയത് ഒരു മണിക്കൂര്‍ കൊണ്ട്. 

പുലര്‍ച്ചെ മുതല്‍ അന്തിമോപചാരം അര്‍പ്പിക്കാന്‍ രാജാജി ഹാളിലേക്ക് പൊതുജനങ്ങളുടെയും പ്രമുഖരുടെയും ഒഴുക്കായിരുന്നു. ജനവികാരം കണക്കിലെടുത്ത് പഴുതടച്ച സുരക്ഷാക്രമീകരണങ്ങളാണ് പൊലിസ് ഒരുക്കിയത്. ഇരമ്പിയെത്തിയ ജനസാഗരത്തെ നിയന്ത്രിക്കാന്‍ കേന്ദ്രസേനയും റാപിഡ് ആക്ഷന്‍ ഫോഴ്‌സും നന്നേ പാടുപെട്ടു. നെഞ്ചത്തടിച്ചുകരഞ്ഞും മതിലില്‍ തലയിട്ടടുച്ചുമൊക്കെ സങ്കടം തീര്‍ത്തവരും നിരവധി. രാജാജി ഹാളില്‍ നിന്ന് മറീന ബീച്ചിലേക്കുള്ള വഴി വിലാപയാത്രയ്ക്കായി സുരക്ഷാസേന ഒഴിച്ചിട്ടിരുന്നെങ്കിലും ഇരുവശങ്ങളിലുമായി ജനം വന്‍മതില്‍ തീര്‍ത്തു.
വിലാപയാത്ര 4.20ന് പുറപ്പെട്ടപ്പോള്‍ ഇരുവശങ്ങളിലും ഒതുങ്ങിമാറിയ ജനക്കൂട്ടം 'അമ്മ'യെ ഒരുനോക്കുകാണാന്‍ നീങ്ങിയതുമൂലം പലയിടത്തും മുന്നോട്ടു നീങ്ങാന്‍ പറ്റാത്ത അവസ്ഥയുണ്ടാക്കി. ജയലളിതയുടെ തോഴി ശശികലയ്ക്കും മുഖ്യമന്ത്രി പനീര്‍ശെല്‍വത്തിനും മാത്രമാണ് അന്ത്യയാത്രയില്‍ ജയലളിതയ്ക്ക് ഒപ്പം മറ്റൊരു വാഹനത്തില്‍ യാത്രചെയ്യാന്‍ കഴിഞ്ഞത്.