തേഞ്ഞിപ്പലം: അവസാന ദിനം ആവേശത്തിന്റെ ഉത്സവമേളം തീര്‍ത്ത പാലക്കാടന്‍ സംഘം 60ാമത് സ്‌കൂള്‍ കായികോത്സവത്തില്‍ കിരീടം സ്വന്തമാക്കി. ആവേശ പോരിനൊടുവില്‍ നിലവിലെ ജേതാക്കളായ എറണാകുളത്തെ എട്ടു പോയിന്റിനു പിന്നിലാക്കിയാണ് കരിമ്പനയുടെ നാട്ടുകാര്‍ തേഞ്ഞിപ്പലം കാലിക്കറ്റ് സര്‍വകലാശാലയിലെ സി.എച്ച് മുഹമ്മദ് കോയ സ്റ്റേഡിയത്തില്‍ ചരിത്രമെഴുതിയത്.
ആദ്യ മൂന്നു ദിനങ്ങളില്‍ മുന്നിട്ടു നിന്ന എറണാകുളം അവസാന ദിനത്തില്‍ പാലക്കാടന്‍ തീക്കാറ്റിനു മുന്നില്‍ നമിച്ചു. 28 സ്വര്‍ണവും 25 വെള്ളിയും 21 നേടി 255 പോയിന്റുമായാണ് പാലക്കാട് കല്ലടി, പറളി, മുണ്ടൂര്‍ സ്‌കൂളുകളിലെ നക്ഷത്ര താരങ്ങളുടെ കരുത്തില്‍ കിരീടത്തില്‍ മുത്തമിട്ടത്. തുടര്‍ച്ചയായ നാലാം കിരീടം സ്വപ്നം കണ്ട എറണാകുളം 247 പോയിന്റുമായി പാലക്കാടിനു മുന്നില്‍ കീഴടങ്ങി.
24 സ്വര്‍ണവും 31 വെള്ളിയും 20 വെങ്കലവുമാണ് എറണാകുളത്തിന്റെ സമ്പാദ്യം. 12 സ്വര്‍ണവും എട്ടു വെള്ളിയും ഏഴു വെങ്കലവും നേടി 101 പോയിന്റുമായി കോഴിക്കോട് മൂന്നാം സ്ഥാനം നിലനിര്‍ത്തി. ജൂനിയര്‍ ആണ്‍കുട്ടികളുടെ റിലേയില്‍ സ്വര്‍ണം നേടിയ എറണാകുളം അയോഗ്യരായതിലൂടെ നഷ്ടമായ 10 പോയിന്റാണ് പാലക്കാടിനെ കിരീടത്തിലേക്ക് നയിച്ചത്. കോഴിക്കോട് മീറ്റില്‍ കിട്ടിയതിനേക്കാള്‍ നാലു സ്വര്‍ണം കൂടുതല്‍ നേടിയാണ് പാലക്കാട് ഇത്തവണ കിരീടം ഉറപ്പിച്ചത്. സ്‌കൂളുകളില്‍ മാര്‍ബേസില്‍ വീണ്ടും കിരീടം നേടി. 14 സ്വര്‍ണവും 13 വെള്ളിയും എട്ടു വെങ്കലവും നേടി 117 പോയിന്റുമായാണ് മാര്‍ബേസില്‍ ചാംപ്യന്‍ സ്‌കൂള്‍ പട്ടം നിലനിര്‍ത്തിയത്.
15 സ്വര്‍ണവും ഏഴു വെള്ളിയും ആറു വെങ്കലവും നേടി 102 പോയിന്റുമായി പാലക്കാട് കല്ലടി സ്‌കൂള്‍ രണ്ടാം സ്ഥാനത്ത് എത്തി. നാലു സ്വര്‍ണവും എട്ടു വെള്ളിയും ആറു വെങ്കലവുമായി 50 പോയിന്റ് നേടിയ കോതമംഗലം സെന്റ് ജോര്‍ജ് നാലാം സ്ഥാനത്തായി. മീറ്റിനു കൊടിയിറങ്ങിയ അവസാന ദിനത്തില്‍ ഇന്നലെ മൂന്ന് റെക്കോര്‍ഡുകള്‍ കൂടി പിറന്നു. നാല് ദിനങ്ങളിലായി നടന്ന മീറ്റില്‍ 15 റെക്കോര്‍ഡുകളാണ് പിറന്നത്.