കുണിയ: ഖുര്‍ആന്‍ പഠനം കാലഘട്ടത്തിന്റെ ആവശ്യമാണെന്ന് പാണക്കാട് സയ്യിദ് അബ്ബാസലി ശിഹാബ് തങ്ങള്‍ പറഞ്ഞു.
ഷറഫുല്‍ ഇസ്‌ലാം ജമാഅത്തിന്റെ കീഴില്‍ പ്രവര്‍ത്തിക്കുന്ന ശംസുല്‍ ഉലമാ മെമ്മോറിയല്‍ എജുക്കേഷന്‍ സെന്ററിന്റെ അക്കാദമിക് കെട്ടിടത്തിനും, അല്‍ ബിര്‍റ് പ്രീ സ്‌കൂള്‍ കെട്ടിടത്തിനും ശിലാസ്ഥാപനം നടത്തി പൊതു സമ്മേളനം ഉദ്ഘാടനം ചെയ്യുകയായിരുന്നു തങ്ങള്‍. ഖുര്‍ആന്‍ പാരായണം അതീവ ഗുരുതര നിലയിലുള്ള രോഗികള്‍ക്ക് പോലും വളരെയധികം ആശ്വാസം പകരുന്നതായി വിദേശ രാജ്യങ്ങളിലെ ഡോക്ടര്‍മാര്‍ കണ്ടെത്തിയിട്ടുണ്ടെന്നും ആധുനിക യുഗത്തില്‍ ഖുര്‍ആനിന്റെ പ്രസക്തി വര്‍ധിച്ചു വരുകയാണെന്നും തങ്ങള്‍ ഉണര്‍ത്തി.
ഖുര്‍ആന്‍ ഹൃദിസ്ഥമാക്കി അതിന്റെ അര്‍ഥ തലങ്ങള്‍ യഥാ വിധി മനസ്സിലാക്കി വിശ്വാസി സമൂഹം ജീവിതം മുന്നോട്ടു നയിക്കണമെന്നും അദ്ദേഹം പറഞ്ഞു.
ചടങ്ങില്‍ കീഴൂര്‍ മംഗളൂരു സംയുക്ത ജമാഅത്ത്, ദക്ഷിണ കന്നഡ ജില്ലാ ഖാസി ത്വാഖ അഹമ്മദ് അല്‍ അസ്ഹരി അധ്യക്ഷനായി. നാസര്‍ ഫൈസി കൂടത്തായി, മഹല്ല് ഖത്വീബ് അബ്ദുല്‍ ഖാദര്‍ നദ്‌വി, മുഷ്താഖ് ദാരിമി തുടങ്ങിയവര്‍ സംസാരിച്ചു.