പുത്തനത്താണി: കടുങ്ങാത്ത്കുണ്ടില്‍ കഴിഞ്ഞ ദിവസം സിപിഎം പ്രവര്‍ത്തകന്‍ മരിച്ച സംഭവം ലീഗ് പ്രവര്‍ത്തകരുടെ ആഹ്‌ളാദ പ്രകടനത്തില്‍ നിന്നു പടക്കമെറിഞ്ഞതിനെത്തുടര്‍ന്നാരോപിച്ചു സി.പി.എം നടത്തിയ ഹര്‍ത്താല്‍ കല്‍പകഞ്ചേരിയിലും വളവന്നൂര്‍ പഞ്ചായത്തിലും അക്രമാസക്തമായി.
ഇന്നലെ വൈകുന്നേരം കുറുക്കോളില്‍ നിന്നും ചെറവന്നൂര്‍ ഭാഗത്തേക്ക് യു.ഡി.എഫ് പ്രവര്‍ത്തകര്‍ നടത്തിയ പ്രകടനം തെക്കത്തിപ്പാറ ഭാഗത്തിലൂടെ കടന്നു പോകുമ്പോള്‍ പ്രകടനത്തില്‍ കരിമരുന്നു പ്രയോഗം നടന്നിരുന്നു. റോഡില്‍വെച്ചു പ്രവര്‍ത്തകര്‍ കോമ്പലപ്പടക്കം പൊട്ടിക്കുന്നതിനിടെ ഒരെണ്ണം കഴിഞ്ഞദിവസം മരണപ്പെട്ട അമ്പലത്തിങ്ങല്‍ വേരുങ്ങല്‍ ഹംസക്കുട്ടി(48)യുടെ പറമ്പിലേക്കു തെറിച്ചു വീണു. ഇതു കണ്ട ഹംസക്കുട്ടി ഓടിവന്നു പ്രവര്‍ത്തകരുമായി വാക്കേറ്റമായി. പ്രവര്‍ത്തകര്‍ ഹംസക്കുട്ടിയുമായി തര്‍ക്കിക്കാന്‍ നില്‍ക്കാതെ ആഹ്‌ളാദ പ്രകടനവുമായി മുന്നോട്ടുനീങ്ങിയെന്നും ഹൃദ്രോഗമാണു മരണകാരണമായതെന്നും പൊലിസ് പറഞ്ഞു. കഠിനമായ നെഞ്ചു വേദനയെത്തുടര്‍ന്നു കോട്ടക്കലിലെ സ്വകാര്യ ആശുപത്രിയിലേക്ക് കൊണ്ടു പോകുമ്പോള്‍ മരണപ്പെടുകയായിരുന്നു.
മരണത്തിനു കാരണക്കാരെ കണ്ടെത്തി അറസ്റ്റ് ചെയ്യണമെന്നാവശ്യപ്പെട്ടാണ് സിപിഎം ഹര്‍ത്താല്‍ നടത്തിയത്. ഹര്‍ത്താലനുകൂലികള്‍ വളാഞ്ചേരി സി.ഐ.യുടെ വാഹനത്തിന്റെ പുറകിലെ ഗ്ലാസ് അടിച്ചു തകര്‍ത്തു. കടുങ്ങാത്ത്കുണ്ടില്‍ നിന്നും പുത്തനത്താണി ഭാഗത്തേക്ക് പോകുന്ന രോഗിയുമായി സഞ്ചരിച്ച കാറിന്റെ ഗ്ലാസ് കല്ലിങ്ങലില്‍ വെച്ചു തകര്‍ത്തു. മറ്റൊരു കാറിന്റെ ഗ്ലാസ് അടിച്ചു തകര്‍ത്തു. കാട്ടിലങ്ങാടിയില്‍ നിന്നും തിരഞ്ഞെടുപ്പ് ആഹ്‌ളാദ പ്രകടനം കഴിഞ്ഞു മൈക്ക് സെറ്റ് ഇറക്കി വെക്കാന്‍ വന്ന സുമോ അടിച്ചു തകര്‍ത്തു.
മാമ്പ്ര പെട്രോള്‍ പമ്പിനു സമീപത്തെ ബസ് വെയിറ്റിംങ് ഷെഡ്, കല്‍പകഞ്ചേരി പഞ്ചായത്തിനു സമീപത്തെ വെയിറ്റിംങ് ഷെഡ് എന്നിവ തകര്‍ത്തു. വിവിധ കേസുകളില്‍ കണ്ടാലറിയാവുന്ന നൂറോളം പേര്‍ക്കെതിരെ കോസെടുത്തു.