ന്യൂഡല്‍ഹി: ഡല്‍ഹിക്കെതിരായ കൂച്ച് ബിഹാര്‍ ട്രോഫി അണ്ടര്‍ 19 ക്രിക്കറ്റില്‍ കേരളത്തിനു ലീഡ്. രണ്ടാം ദിനം കളി നിര്‍ത്തുമ്പോള്‍ കേരളം നാലു വിക്കറ്റ് നഷ്ടത്തില്‍ 159 റണ്‍സെന്ന നിലയില്‍. ആറു വിക്കറ്റുകള്‍ ശേഷിക്കേ കേരളത്തിനു 158 റണ്‍സ് ലീഡ്.
ആദ്യ ഇന്നിങ്‌സില്‍ കേരളം 151 റണ്‍സിനു പുറത്തായപ്പോള്‍ ഡല്‍ഹിയുടെ പോരാട്ടം 152ല്‍ അവസാനിപ്പിക്കാന്‍ കേരളത്തിനായി.
സെഞ്ച്വറി (103) നേടി പുറത്താകാതെ നില്‍ക്കുന്ന ഓപണര്‍ രോഹന്‍ എസ് കുന്നുമ്മലിന്റെ ബാറ്റിങാണ് രണ്ടാം ഇന്നിങ്‌സില്‍ കേരളത്തിനു തുണയായത്. 25 റണ്‍സെടുത്ത ഡാരിയല്‍ ഫെരാരിയോ രോഹനെ പിന്തുണച്ചു. കളി നിര്‍ത്തുമ്പോള്‍ അഞ്ചു റണ്‍സുമായി ഉണ്ണിമോന്‍ സാബുവാണ് രോഹനൊപ്പം ക്രീസില്‍.
നേരത്തെ ഏഴു വിക്കറ്റു വീഴ്ത്തിയ നായകന്‍ സിജോമോന്‍ ജോസഫിന്റെ മികച്ച ബൗളിങാണ് ഡല്‍ഹിയുടെ സ്‌കോര്‍ 152റണ്‍സില്‍ ഒതുക്കിയത്.