കാന്‍ബെറ: രണ്ടാം ഏകദിനത്തിലും ന്യൂസിലന്‍ഡിനെ തകര്‍ത്ത് ആസ്‌ത്രേലിയ ഏകദിന പരമ്പര സ്വന്തമാക്കി. 116 റണ്‍സിനാണ് ആസ്‌ത്രേലിയ വിജയം സ്വന്തമാക്കിയത്.
ആദ്യം ബാറ്റു ചെയ്ത ഓസീസ് നിശ്ചിത 50 ഓവറില്‍ അഞ്ചു വിക്കറ്റ് നഷ്ടത്തില്‍ 378 റണ്‍സെന്ന മികച്ച സ്‌കോര്‍ പടുത്തുയര്‍ത്തിയപ്പോള്‍ കിവികളുടെ ചെറുത്ത് നില്‍പ്പ് 47.2 ഓവറില്‍ 262 റണ്‍സില്‍ അവസാനിച്ചു. ഡേവിഡ് വാര്‍ണറാണ് കളിയിലെ കേമന്‍. ആദ്യ മത്സരം ജയിച്ച ഓസീസ് മൂന്നു മത്സരങ്ങളുടെ പരമ്പര സ്വന്തമാക്കി.
ഡേവിഡ് വാര്‍ണറുടെ സെഞ്ച്വറിയും (119), മധ്യനിര ബാറ്റ്‌സ്മാന്‍ മിച്ചല്‍ മാര്‍ഷിന്റെ തീപ്പാറും ബാറ്റിങുമാണ് ഓസീസിനു കൂറ്റന്‍ സ്‌കോര്‍ സമ്മാനിച്ചത്. 40 പന്തില്‍ ഏഴു സിക്‌സും രണ്ടു ഫോറും പറത്തി മാര്‍ഷ് 76 റണ്‍സ് വാരി പുറത്താകാതെ നിന്നു. 115 പന്തില്‍ 19 ഫോറും ഒരു സിക്‌സും ഉള്‍പ്പടെയാണ് വാര്‍ണര്‍ 119 റണ്‍സ് നേടിയത്. ക്യാപ്റ്റന്‍ സ്റ്റീവന്‍ സ്മിത്ത് (72), ട്രാവിസ് ഹെഡ്ഡ് (57) എന്നിവരും വാര്‍ണര്‍ക്ക് മികച്ച പിന്തുണ നല്‍കി.
കൂറ്റന്‍ വിജയ ലക്ഷ്യം പിന്തുടര്‍ന്ന കിവീസിന് മികച്ച തുടക്കം ലഭിച്ചെങ്കിലും കൃത്യമായ ഇടവേളകളില്‍ വിക്കറ്റ് വീണത് വിനയായി. ക്യാപ്റ്റന്‍ കെയ്ന്‍ വില്യംസന്‍ (81), ജയിംസ് നീഷം (74), മാര്‍ട്ടിന്‍ ഗുപ്റ്റില്‍ (45) എന്നിവര്‍ തിളങ്ങി. ഓസീസിന് വേണ്ടി പാറ്റ് കമ്മിന്‍സ് നാലു വിക്കറ്റുകള്‍ പിഴുതു. വീഴ്ത്തി.