കാക്കനാട്: കാക്കനാട് സെസ് ഭാഗത്ത് നിന്നും ഇന്‍ഫൊ പാര്‍ക്കിലെ ജോലി സ്ഥലത്തേക്ക് യൂബര്‍ ടാക്‌സി വിളിച്ച് യാത്ര ചെയ്ത യുവതിയെ കാറിനുള്ളില്‍ വച്ച് അപമാനിച്ച സംഭവത്തില്‍ കാര്‍ ഡ്രൈവറെ ഇന്‍ഫൊ പാര്‍ക്ക് പൊലിസ് അറസ്റ്റു ചെയ്തു.
കാക്കനാട് വാഴക്കാല ചെട്ടിമൂലപ്പറമ്പ് കാവനാട് വീട്ടില്‍ ഫൈസല്‍ അബ്ദുള്ള (31) യാണ് അറസ്റ്റിലായത്. പ്രതിയുടെ ഉടമസ്ഥതയിലുള്ള കാര്‍ യൂബര്‍ ടാക്‌സിയായി ഓടിച്ചു വരവെ ചൊവ്വാഴ്ച്ച ഉച്ചയോടെയാണ് സംഭവം.ടാക്‌സിയില്‍ കയറിയ സമയം മുതല്‍ പിന്നിലിരുന്ന് യാത്ര ചെയ്തിരുന്ന യുവതിയെ റിയര്‍വ്യൂ മിററിലൂടെ നോക്കി സാവധാനത്തില്‍ വാഹനം ഓടിക്കുകയും ചെയ്തു.
വേഗതയില്‍ വാഹനം ഓടിക്കുന്നതിനുള്ള യുവതിയുടെ ആവശ്യം പ്രതി നിരാകരിക്കുകയും ഡ്രൈവിങ് സീറ്റിലിരുന്ന റിയര്‍വ്യൂ മിററിലൂടെ യുവതിയെ നോക്കി അശ്ലീല പ്രവര്‍ത്തനം കാണിക്കുകയും ചെയ്തതായി യുവതി പരാതിയില്‍ പറയുന്നു.ഇന്‍ഫൊ പാര്‍ക്ക് ഈസ്റ്റ് ഗേറ്റിനു സമീപം വാഹനം നിര്‍ത്തിച്ച് സുരക്ഷാ ഡ്യൂട്ടിയിലുണ്ടായിരുന്ന സായുധ പൊലിസിനെ യുവതി വിവരം അറിയിക്കുകയായിരുന്നു. യുവതിയുടെ പരാതിയില്‍ കേസെടുത്ത് അന്വേഷണം നടത്തിയതിനെ തുടര്‍ന്ന് ഈസ്റ്റ് ഗേറ്റിനു ഭാഗത്തു നിന്നും ഇന്‍ഫൊ പാര്‍ക്ക് സി.ഐ പി.കെ രാധാമണി, എസ്.ഐ തൃദീപ് ചന്ദ്രന്‍ എന്നിവരുടെ നേതൃത്വത്തില്‍ പ്രതിയെ അറസ്റ്റ് ചെയ്തു. പ്രതിയെ കാക്കനാട് മജിസ്‌ട്രേറ്റ് കോടതിയില്‍ ഹാജരാക്കി.