കൊച്ചി: സര്‍ട്ടിഫിക്കറ്റുകള്‍ നല്‍കാതെ ഏജന്‍സി കബളിപ്പിക്കുന്നതായി പരാതി. സ്വകാര്യ എജന്‍സി വഴി കുവൈറ്റില്‍ ജോലിനോക്കുന്ന ഒരുപറ്റം നഴ്‌സുമാരുടെ ബന്ധുക്കളാണ് വാര്‍ത്താസമ്മേളനത്തില്‍ ഏജന്‍സിക്കെതിരെ പരാതിയുമായി എത്തിയത്.
ഹിബ എക്‌സപോര്‍ട്ടേഴ്‌സ് ഇന്ത്യ എന്ന സ്ഥാപനം വഴി കുവൈറ്റില്‍ ജോലിക്ക് പോയവരുടെ സര്‍ട്ടിഫിക്കറ്റുകള്‍ തിരിതെ നല്‍കുന്നതിനായി എട്ടുലക്ഷം രൂപ ആവശ്യപ്പെട്ടന്നാണ് ഇവരുടെ ആരോപണം. ഹിബയുടെ പരസ്യം കണ്ട് അപേക്ഷ നല്‍കിയവരുടെ പ്ലസ്ടു മുതലുള്ള സര്‍ട്ടിഫിക്കറ്റുകള്‍ ഏജന്‍സി വാങ്ങിയ ശേഷം 15 ലക്ഷം രൂപ വീതം ഓരോരുത്തരില്‍ നിന്ന് വാങ്ങിയാണ് കുവൈത്തിലേക്ക് ഇവരെ ജോലിക്ക് അയച്ചതെന്ന് ബന്ധുക്കള്‍ പറഞ്ഞു.
ജോലിക്ക് കയറിയവര്‍ പിന്നീട് തങ്ങളുടെ സര്‍ട്ടിഫിക്കറ്റ് വേണമെന്ന് ഏജന്‍സിയോട് ആവശ്യപ്പെട്ടപ്പോള്‍ ഇനി എട്ട് ലക്ഷം രൂപ തന്നാല്‍ മാത്രമേ സര്‍ട്ടിഫിക്കറ്റുകള്‍ തിരിച്ചുതരാന്‍ സാധിക്കുകയുള്ളെന്ന് അറിയിച്ചതായി ബന്ധുക്കള്‍ പറഞ്ഞു. ഇതിനെതിരെ പൊലിസിലും മുഖ്യമന്ത്രിക്കും പരാതി നല്‍കിയെങ്കിലും യാതൊരുവിധ നടപടികളും ഉണ്ടായിട്ടില്ലെന്നും ഇവര്‍ ആരോപക്കുന്നു. കൂടാതെ മുഖ്യമന്ത്രിുെട ബന്ധുവാണെന്ന് അവകാശപ്പെട്ട് ഏജന്‍സിയിലെ ഒരാള്‍ തങ്ങളെ ഫോണില്‍ വിളിച്ച് ഭീഷണിപ്പെടുത്തിയതായും ഇവര്‍ പറഞ്ഞു. വാര്‍ത്താ സമ്മേളനത്തില്‍ ശശി കെ.ജി, അരുണ്‍ കുമാര്‍ വി.എം, ഡിക്‌സന്‍ ജോണ്‍, അജീഷ് തുടങ്ങിയവര്‍ പങ്കെടുത്തു.