ബോവിക്കാനം: പൊവ്വലിലെ അബ്ദുല്‍ ഖാദറി(24)നെ കുത്തിക്കൊലപ്പെടുത്തിയ കേസിലെ മുഖ്യപ്രതി പൊലിസ് വലയില്‍. സംഭവത്തിനു ശേഷം ഒളിവില്‍ പോയ ബോവിക്കാനം മുതലപാറയിലെ നസീറാണു പൊലിസ് വലയിലായത്.
ഇന്നലെ പുലര്‍ച്ചെ നാട്ടിലെത്തിയതായി വിവരം ലഭിച്ചതിനെ തുടര്‍ന്ന് ആദൂര്‍ സി.ഐ സിബി തോമസിന്റെ നേതൃത്വത്തിലുള്ള പൊലിസാണു ഇയാളെ പിടികൂടിയത്.
ഇയാളെ ചോദ്യം ചെയ്യുന്നതോടെ കൂടുതല്‍ പ്രതികളുണ്ടോയെന്നു വ്യക്തമാവും. അബ്ദുല്‍ ഖാദറിന്റെ സുഹൃത്തുക്കളായ പൊവ്വലിലെ അസിയാദ്, സത്താദ് അനസ് എന്നിവര്‍ക്കും കുത്തേറ്റിരുന്നു. കഴിഞ്ഞ ദിവസം ഇവരില്‍ നിന്നു പൊലിസ് മൊഴിയെടുത്തിരുന്നു.
സംഭവം നടന്ന സി.എച്ച്.സി റോഡിലെ ഒരു കടയില്‍ സ്ഥാപിച്ചിട്ടുള്ള സി.സി.ടി.വി കാമറയിലെ ദൃശ്യങ്ങള്‍ പൊലിസ് പരിശോധിച്ചിരുന്നു. ഈ മാസം ഒന്നിനു വൈകുന്നേരം ബോവിക്കാനം ടൗണിലാണ് അബ്ദുല്‍ ഖാദര്‍ കുത്തേറ്റു മരിച്ചത്. ഫുട്‌ബോള്‍ കളിയെച്ചൊല്ലിയുണ്ടായ വാക്കുതര്‍ക്കമാണു കൊലയില്‍ കലാശിച്ചത്.