ആറ്റിങ്ങല്‍: ലിഫ്റ്റില്‍ കുടുങ്ങിയവരെ അഗ്നിശമന സേനയെത്തി രക്ഷിച്ചു. ആറ്റിങ്ങല്‍ചിറയിന്‍കീഴ് റോഡില്‍ വീരളത്തിന് സമീപമുളള ബാങ്ക് ഉള്‍പ്പെടെയുള്ള സ്ഥാപനങ്ങള്‍ പ്രവര്‍ത്തിക്കുന്ന സ്വകാര്യ കെട്ടിടത്തിലെ ലിഫ്റ്റിലാണ് ശനിയാഴ്ച രാവിലെ രണ്ടുപേര്‍ കുടുങ്ങിയത്.
ഈ കെട്ടിടത്തില്‍ പ്രവര്‍ത്തിക്കുന്ന സ്ഥാപനത്തില്‍ പഠിക്കാനെത്തിയ രണ്ടുപേര്‍ ലിഫ്റ്റില്‍ കയറി മുകളിലേക്ക് പോകുന്നതിനിടെ ലിഫ്റ്റ് തകരാറിലായി നിന്നു. പാറശാല സ്വദേശി ജിബിന്‍ രാജ്, പുരവൂര്‍ സ്വദേശി മഞ്ജു എന്നിവരാണ് ലിഫ്റ്റില്‍ കുടുങ്ങിയത്. രാവിലെ 9.15 നായിരുന്നു സംഭവം.
വിവരമറിഞ്ഞ് ആറ്റിങ്ങല്‍ അഗ്‌നിരക്ഷാനിലയത്തിലെ സ്‌റ്റേഷന്‍ ഓഫിസര്‍ സുരേഷ്‌കുമാറിന്റെ നേതൃത്വത്തിലുളള സംഘമെത്തി ഹൈഡ്രേളിക് സംവിധാനം ഉപയോഗിച്ച് ലിഫ്റ്റ് താഴെയിറക്കി ഉള്ളില്‍ കുടുങ്ങിയവരെ പുറത്തിറക്കി. 15 മിനിട്ടിനുള്ളില്‍ രക്ഷാ പ്രവര്‍ത്തനം നടന്നതിനാല്‍ ചെറിയ ശ്വാസതടസം മാത്രമാണ് ലിഫ്റ്റില്‍ കുടുങ്ങിയവര്‍ക്ക് അനുഭവപ്പെട്ടത്.