വാണിമേല്‍: സ്വാതന്ത്ര്യ സമരപോരാട്ടങ്ങളില്‍ എല്ലാം നഷ്ടപ്പെട്ട കേരളത്തിലെ മുസ്‌ലിം സമുദായത്തെ കൈ പിടിച്ചുയര്‍ത്തി വിദ്യാഭ്യാസപരമായി ഉന്നതിയിലെത്തിച്ചതിനു പിന്നില്‍ മുസ്‌ലിം ലീഗാണെന്ന് പാറക്കല്‍ അബ്ദുല്ല എം.എല്‍.എ പറഞ്ഞു. വാണിമേല്‍ പഞ്ചായത്ത് മുസ്‌ലിം ലീഗ് കമ്മിറ്റിക്കു കീഴില്‍ പ്രവര്‍ത്തന സജ്ജമായ സീതിസാഹിബ് പഠന കേന്ദ്രത്തിന്റെയും തറുവൈ ഹാജി ജന സേവാ കേന്ദ്രത്തിന്റെയും ഉദ്ഘാടനം നിര്‍വഹിച്ചു സംസാരിക്കുകയായിരുന്നു അദ്ദേഹം.
വി.കെ കുഞ്ഞാലിമാസ്റ്റര്‍ അധ്യക്ഷനായി. ഖത്തര്‍ കെ.എം.സി.സിയുടെ സഹകരണത്തോടെ ഇരുപത് ലക്ഷംരൂപ ചിലവില്‍ നിര്‍മിച്ച പഠന കേന്ദ്രം ആധുനിക സജ്ജീകരണങ്ങളോട് കൂടിയതാണ്. ഓഫിസ് കെട്ടിടത്തില്‍ നവീകരിച്ച കോണ്‍ഫ്രന്‍സ് ഹാളിന്റെ ഉദ്ഘാടനം അബ്ദുറഹ്മാന്‍ രണ്ടത്താണി നിര്‍വഹിച്ചു.
സി.വി.എം വാണിമേല്‍, സി.കെ സുബൈര്‍, പി ശാദുലി, സൂപ്പി നരിക്കാട്ടേരി, പി.പി റഷീദ്, മുഹമ്മദ് ബംഗ്ലത്ത്, എം.പി സൂപ്പി, എന്‍.കെ മൂസ മാസ്റ്റര്‍ തുടങ്ങിയവര്‍ പ്രസംഗിച്ചു. കെ.കെ നവാസ് സ്വാഗതവും, ടി ആലിഹസന്‍ നന്ദിയും പറഞ്ഞു.