കൊല്ലം: എലിപ്പനിക്കെതിരെ ജാഗ്രത പാലിക്കണമെന്ന് ജില്ലാ മെഡിക്കല്‍ ഓഫിസര്‍ അറിയിച്ചു.ക്ഷീണത്തോടെയുള്ള പനിയും തലവേദനയും പേശിവേദനയുമാണ് ലക്ഷണങ്ങള്‍. ആരംഭത്തില്‍ ഡോക്ടറെ കണ്ട് ചികിത്സയെടുത്താല്‍ രോഗം പൂര്‍ണമായും സുഖപ്പെടുത്താം.
വയലില്‍ പണിയെടുക്കുന്നവരിലും ഓട, തോട്, കനാല്‍, കുളങ്ങള്‍, വെള്ളക്കെട്ടുകള്‍, തൊഴുത്ത് എന്നിവ വൃത്തിയാക്കുന്നവരിലും രോഗം കൂടുതല്‍ കാണപ്പെടുന്നുണ്ട്. കൈകാലുകളിലും മറ്റ് ശരീര ഭാഗങ്ങളിലും മുറിവുള്ളവര്‍ അത് ഉണങ്ങുന്നതുവരെ ഇത്തരം ജോലികളില്‍ ഏര്‍പ്പെടരുത്. ഇത്തരം ജോലിചെയ്യുന്നവര്‍ എലിപ്പനിക്കെതിരെയുള്ള പ്രതിരോധ മരുന്ന് കൃത്യമായി കഴിക്കേണ്ടതാണ്.
കെട്ടിക്കിടക്കുന്ന വെള്ളം ഉപയോഗിക്കുന്നത് ഒഴിവാക്കണം. വീടും പരിസരവും വൃത്തിയായി സൂക്ഷിക്കാന്‍ ശ്രദ്ധിക്കണം. പട്ടി, പൂച്ച തുടങ്ങിയ ജീവികളുടെയും കന്നുകാലികളുടെയും വിസര്‍ജ്യങ്ങള്‍ വ്യക്തിസുരക്ഷയോടെ മാത്രം കൈകാര്യം ചെയ്യണമെന്നും ജില്ലാ മെഡിക്കല്‍ ഓഫിസര്‍ നിര്‍ദേശിച്ചു.