വളാഞ്ചേരി: ജലവിഭവങ്ങളുടെ സംരക്ഷണവും മാലിന്യസംസ്‌കരണവും ജൈവ പച്ചക്കറി കൃഷി പ്രോത്സാഹനവും മുഖ്യലക്ഷ്യമാക്കി കേരളത്തിന്റെ സമഗ്രവികസനത്തിനു സംസ്ഥാന സര്‍ക്കാര്‍ ആവിഷ്‌കരിച്ച ഹരിത കേരളം മിഷന്റെ ജില്ലാതല ഉദ്ഘാടനം വളാഞ്ചേരി നഗരസഭയിലെ കാവുംപുറത്ത് മന്ത്രി ഡോ. കെ.ടി ജലീല്‍ നിര്‍വഹിച്ചു. കുടുംബശ്രീ അയല്‍കൂട്ടങ്ങള്‍വഴി നാലര ലക്ഷം മഴക്കുഴി നിര്‍മാണം പൂര്‍ത്തീകരിച്ചതിന്റെ ഭാഗമായി മലപ്പുറത്തെ സമ്പൂര്‍ണ മഴക്കുഴി ജില്ലയായി മന്ത്രി പ്രഖ്യാപിച്ചു. മഴവെള്ളക്കൊയ്ത്തിലൂടെ ഭൂഗര്‍ഭജല സംരക്ഷണം ഉറപ്പാക്കുന്നതിനു തൊഴുവാനൂര്‍ ഇ.എം.എസ് വായനശാലയുടെ പൊതുകിണര്‍ റീചാര്‍ജിങ് പദ്ധതി ഉദ്ഘാടനവും മന്ത്രി നിര്‍വഹിച്ചു.

പ്രൊഫ. ആബിദ് ഹുസൈന്‍ തങ്ങള്‍ എം.എല്‍.എ അധ്യക്ഷനായി. ജില്ലാപഞ്ചായത്ത് പ്രസിഡന്റ് എ.പി ഉണ്ണികൃഷ്ണന്‍, ജില്ലാ കലക്ടര്‍ അമിത് മീണ, കുറ്റിപ്പുറം ബ്ലോക്ക് പഞ്ചായത്ത് പ്രസിഡന്റ് ആതവനാട് മുഹമ്മദ് കുട്ടി, വളാഞ്ചേരി നഗരസഭാ ചെയര്‍പെഴ്‌സണ്‍ എം. ഷാഹിന, വൈസ് ചെയര്‍മാന്‍ കെ.വി ഉണ്ണികൃഷ്ണന്‍, സ്ഥിരംസമിതി അധ്യക്ഷരായ സി. അബ്ദുന്നാസര്‍, സി. രാമകൃഷ്ണന്‍, സി.കെ റുഫീന, ചെങ്കുണ്ടന്‍ ഷെഫീന, കെ. ഫാത്തിമക്കുട്ടി, കൗണ്‍സിലര്‍ ടി.പി അബ്ദുല്‍ ഗഫൂര്‍ സംസാരിച്ചു. കുടുംബശ്രീയുടെ നേതൃത്വത്തില്‍ ജില്ലയില്‍ 1,110 ഏക്കര്‍ സ്ഥലത്ത് ജൈവകൃഷി ഇറക്കുന്നതിനുള്ള പദ്ധതിക്ക് വളാഞ്ചേരി മൈലാടിയില്‍ തുടക്കമായി. നഗരസഭ ചെയര്‍പേഴ്‌സണ്‍ എം. ഷാഹിന ടീച്ചര്‍ ഉദ്ഘാടനം ചെയ്തു. നഗരസഭാ കൗണ്‍സിലര്‍മാര്‍, കുടുംബശ്രീ ജില്ലാമിഷന്‍ കോഡിനേറ്റര്‍ ഹേമലത സി.കെ, സി.ഡി.എസ് ചെയര്‍പേഴ്‌സണ്‍, സി.ഡി.എസ് മെമ്പര്‍മാര്‍, കുടുംബശ്രീ പ്രവര്‍ത്തകര്‍ തുടങ്ങിയവര്‍ പങ്കെടുത്തു.

ജില്ലയിലെ 2,147 വാര്‍ഡുകളിലായി ഓരോ വാര്‍ഡിലും ഇതുവരെ കൃഷി ചെയ്തിട്ടില്ലാത്ത 50 സെന്റ് സ്ഥലം വീതമാണ് കണ്ടെത്തിയിട്ടുള്ളത്. പുതുതായി രൂപീകരിച്ച കൃഷി യൂനിറ്റുകളാണ് കൃഷി ചെയ്യുന്നത്. എല്ലാ വാര്‍ഡുകളിലും ഇന്നലെതന്നെ വിത്തിറക്കി.