തളിപ്പറമ്പ്: ദേശീയപാതയില്‍ കുട്ടൂക്കന്‍ കോംപ്ലക്‌സിനു മുന്നില്‍ നിയന്ത്രണം വിട്ട കാര്‍ രണ്ട് വൈദ്യുതി തൂണുകള്‍ ഇടിച്ചു തെറിപ്പിച്ചു. ഒരാള്‍ക്ക് പരുക്ക്. ഇന്നലെ രാവിലെ 5.45ഓടെയായിരുന്നു അപകടം. വൈദ്യുതി നിലച്ചതിനാല്‍ വന്‍ ദുരന്തം ഒഴിവായി. കോഴിക്കോട് നിന്നു മംഗളൂരുവിലേക്ക് പോകുകയായിരുന്ന കാറില്‍ ഒരു കുടുംബത്തിലെ എട്ടു പേരാണ് ഉണ്ടായിരുന്നത്. പരുക്കേറ്റ ഖാദര്‍ മുഹമ്മദ് ജലീലിനെ(33) പരിയാരം മെഡിക്കല്‍ കോളജില്‍ പ്രവേശിപ്പിച്ചു. മറ്റുള്ളവര്‍ക്ക് നിസാര പരുക്കേറ്റു. ഇവരെ പ്രാഥമിക ചികിത്സ നല്‍കി വിട്ടയച്ചു. കാര്‍ റോഡരികിലെ ഒരു പോസ്റ്റ് ഇടിച്ചു തകര്‍ത്ത ശേഷം മറ്റൊരു പോസ്റ്റിലിടിച്ചാണ് നിന്നത്. തളിപ്പറമ്പ് പൊലിസ് സ്ഥലത്തെത്തി.