തൃശൂര്‍: ആയുര്‍വേദ മെഡിക്കല്‍ അസോസിയേഷന്‍ ഓഫ് ഇന്ത്യ(എഎംഎഐ)യുടെ ജില്ലാ സമ്മേളനം നാളെ തൃശൂര്‍ ഹോട്ടല്‍ എലൈറ്റില്‍ നടക്കും. 150ഓളം ഡോക്്ടര്‍മാര്‍ സമ്മേളനത്തില്‍ പങ്കെടുക്കും. രാവിലെ 9.30ന് 'കരള്‍സംബന്ധമായ അസുഖങ്ങളെ കുറിച്ച് നടക്കുന്ന ശാസ്ത്രചര്‍ച്ചയോടെ സമ്മേളനം ആരംഭിക്കും. ഡോ. ജോസ് ടി. പൈകട, ഡോ. വിനോദ് വാര്യര്‍ എന്നിവര്‍ നേതൃത്വം നല്‍കും. 11ന് എഎംഎഐ സംസ്ഥാന പ്രസിഡന്റ് ഡോ.ജി. വിനോദ്കുമാര്‍ പ്രതിനിധി സമ്മേളനം ഉദ്ഘാടനം ചെയ്യും. പുതിയ ജില്ലാ കമ്മിറ്റി തെരഞ്ഞെടുപ്പും നടക്കും. പൊതുസമ്മേളനം ഉച്ചയ്ക്കു രണ്ടിന് മന്ത്രി സി. രവീന്ദ്രനാഥ് ഉദ്ഘാടനം ചെയ്യും. ഔഷധി ചെയര്‍മാന്‍ ഡോ.കെ.ആര്‍. വിശ്വംഭരന്‍ വിശിഷ്്ടാതിഥിയാകും.
സംഘടനയുടെ നേതൃത്വത്തില്‍ ജില്ലയില്‍ തുടക്കംകുറിക്കുന്ന വനിത ക്ലിനിക്കുകളിലേക്ക് പരിശീലനം പൂര്‍ത്തിയാക്കിയ ഡോക്്ടര്‍മാര്‍ക്കുള്ള സര്‍ട്ടിഫിക്കറ്റ് വിതരണവും ജീവിതശൈലി ക്ലിനിക്കിന്റെ പരിശീലനോദ്ഘാടനവും നടക്കും. എഎംഎഐ വനിത ക്ലിനിക്കിന്റെ ഭാഗമായി ജനുവരി 22ന് മാധ്യമപ്രവര്‍ത്തകര്‍ക്കും കുടുംബാംഗങ്ങളിലെ വനിതകള്‍ക്കും സാഹിത്യ അക്കാദമി ചങ്ങമ്പുഴ ഹാളില്‍ പ്രത്യേക മെഡിക്കല്‍ക്യാമ്പും നടത്തും. ജില്ലാ പ്രസിഡന്റ് ഡോ.പി. ഗോപിദാസ്, ജില്ലാ സെക്രട്ടറി ഡോ.പി.കെ. നേത്രദാസ്, ഡോ.വി.സി. ദീപ്, ഡോ.എം. ചന്ദ്രശേഖരന്‍ പത്രസമ്മേളനത്തില്‍ പങ്കെടുത്തു.