മട്ടാഞ്ചേരി: പള്ളുരുത്തി ഭാഗത്ത് തൊഴില്‍ രഹിതരായ യുവാക്കളെ വിദേശത്ത് ജോലി വാഗ്ദാനം ചെയ്ത് പണം തട്ടിയെടുത്തിരുന്നയാള്‍ പിടിയിലായി. കൊല്ലം പത്തനാപുരം അമ്പിളി ഭവനില്‍ പ്രദീപ് (42) നെയാണ് പള്ളുരുത്തി പൊലിസ് അറസ്റ്റ് ചെയ്തത്.
 പള്ളുരുത്തി സ്വദേശികളായ ഷാനവാസില്‍ നിന്നും 75,000 രൂപയും ജയിംസില്‍ നിന്നും 55,000 രൂപയും ജോജിയില്‍ നിന്നും 40,000 രൂപയും ജെനീഷില്‍ നിന്നും 45,000 രൂപയും ഇയാള്‍ കബളിപ്പിച്ചു കൈക്കലാക്കിയതായി പൊലിസിന് പരാതി ലഭിച്ചിരുന്നു. കൊല്ലം ,കുണ്ടറ സ്വദേശിയായ ബിജുവില്‍ നിന്നും 45,000 രൂപയും ഇയാള്‍ കൈക്കലാക്കിയതായും പരാതിയുണ്ട്.
ഖത്തറിലെ പ്രശസ്തമായ കമ്പനിയില്‍ ജോലി വാഗ്ദാനം ചെയ്താണ് ഇയാള്‍ പണം തട്ടിയിരുന്നത്. കേരളത്തിലെ വിവിധ ജില്ലകളില്‍ നിന്നുള്ള യുവാക്കളെ ഇയാള്‍ കബളിപ്പിച്ചിരുന്നതായാണ് പൊലിസിന് ലഭിച്ച വിവരം.
 പ്രതി കൊല്ലം, പുനലൂരില്‍ ഉണ്ടെന്ന വിവരം അറിഞ്ഞ് മട്ടാഞ്ചേരി അസി.പൊലിസ് കമ്മിഷണര്‍ എസ് വിജയന്റെ സ്‌ക്വാഡിലുള്ള സീനിയര്‍ സിവില്‍ പൊലിസ് ആഫിസര്‍ ആര്‍ അനില്‍കുമാര്‍, കെ.ടി അനില്‍കുമാര്‍ , സിവില്‍ പൊലിസ് ഓഫിസര്‍മാരായ ഫ്രാന്‍സിസ്, രതീഷ് ബാബു എന്നിവര്‍ വിസക്കായി എന്ന വ്യാജേന സമീപിച്ച് പ്രതിയെ കുടുക്കുകയായിരുന്നു.