ആലപ്പുഴ:  ലജ്‌നത്തുല്‍ മുഹമ്മദിയായുടെ നേതൃത്വത്തില്‍ വിപുലമായ നബിദിന ഘോഷയാത്രയ്ക്കും പൊതുസമ്മേളനത്തിനുമുള്ള ഒരുക്കങ്ങള്‍ പൂര്‍ത്തിയായി.
12 ന് ഉച്ചകഴിഞ്ഞ് 3ന്  മുമ്പായി ആലപ്പുഴ പട്ടണത്തിലെ വിവിധ മഹല്ലുകളില്‍ നിന്നും കിഴക്കേ മുസ്‌ലിം ജമാ അത്ത് പള്ളിയില്‍ (മസ്താന്‍ പള്ളി) എത്തിച്ചേരും. അസര്‍ നമസ്‌ക്കാരാനന്തരം ലജ്‌നത്തുല്‍ മുഹമ്മദിയ്യാ സെന്‍ട്രല്‍ കൗണ്‍സില്‍ അംഗങ്ങള്‍, മഹല്ല് ഖത്തീബുമാര്‍, ഇമാമുമാര്‍, മഹല്ല് പ്രസിഡന്റ്, സെക്രട്ടറിമാര്‍ എന്നിവരുടെ നേതൃത്വത്തില്‍ പ്രധാന ഘോഷയാത്ര കൊമേഴ്‌സ്യല്‍ കനാലിന്റെ തെക്കേ കരയിലൂടെ പടിഞ്ഞാറോട്ട് നീങ്ങി ഹാജി ഹാഷിം ജംഗ്ഷനില്‍ നിന്നും ലജ്‌നത്ത് കാമ്പൗണ്ടില്‍ എത്തിച്ചേരും.
തുടര്‍ന്ന് 6.30 ന് ലജ്‌നത്തുല്‍ മുഹമ്മദിയ്യാ പ്രസിഡന്റ് എ.എം. നസീറിന്റെ അധ്യക്ഷതയില്‍ ചേരുന്ന പൊതുസമ്മേളനം എ.പി.ജെ. അബ്ദുല്‍ കലാം ടെക്‌നോളജിക്കല്‍ യൂണിവേഴ്‌സിറ്റി പ്രൊ. വൈസ് ചാന്‍സലര്‍ ഡോ. എം. അബ്ദുല്‍ റഹ്മാന്‍ ഉദ്ഘാടനം നിര്‍വ്വഹിക്കും. പി.മുഹമ്മദ് സലീം ഫൈസി, ഇര്‍ഫാനി അല്‍ അസ്ഹരി കണ്ണൂര്‍,കെ.എം. ഇസ്മയില്‍ സഖാഫി നെല്ലിക്കുഴി എന്നിവര്‍ പ്രഭാഷണം നടത്തും. ഘോഷയാത്രയില്‍ മികവ് തെളിയിക്കുന്ന മഹല്ലുകള്‍ക്ക് ആലപ്പുഴ ഡി.വൈ.എസ്.പി. എം.ഇ. ഷാജഹാന്‍ സമ്മാനദാനം നിര്‍വ്വഹിക്കുന്നതുമാണെന്ന് ജനറല്‍ സെക്രട്ടറി എ. ഹബീബ് മുഹമ്മദ് അറിയിച്ചു.