തൊടുപുഴ: കാണാതായ യുവതിയെ കൊലപ്പെടുത്തിയതായി സൂചന. സംഭവവുമായി ബന്ധപ്പെട്ട് മലയാളി പാസ്റ്റര്‍ അടക്കം രണ്ടുപേരെ തമിഴ്‌നാട്ടില്‍ നിന്നും പൊലിസ് കസ്റ്റഡിയിലെടുത്തു. ഇടുക്കി ഉപ്പുതറ സ്വദേശി സലിന്‍, തമിഴ്‌നാട് ഉത്തമപാളയം സ്വദേശി ജെയിംസ് എന്നിവരാണ് അടിമാലി സര്‍ക്കിള്‍ ഇന്‍സ്‌പെക്ടര്‍ കെ.എ. യൂനുസിന്റെ നേതൃത്വത്തിലുള്ള പൊലിസ് സംഘത്തിന്റെ കസ്റ്റഡിയിലുള്ളത്.
പണിയ്ക്കന്‍കുടി തിങ്കള്‍ക്കാട് പൊന്നേടത്തുംപറമ്പില്‍ ബാബുവിന്റെ ഭാര്യ സാലു (42)വിനെയാണ് കഴിഞ്ഞ മാസം മൂന്നു മുതല്‍ കാണാതായത്. കഴിഞ്ഞ മാസം 18ന് ബന്ധുക്കളുടെ പരാതിയുടെ അടിസ്ഥാനത്തില്‍ വെള്ളത്തൂവല്‍ പൊലിസ് കേസെടുത്ത് അന്വേഷണം ആരംഭിച്ചിരുന്നു. തുടര്‍ന്ന് സാലുവിന് ഉപ്പുതറ സ്വദേശിയായ പാസ്റ്ററുമായി അടുപ്പമുള്ളതായ വിവരത്തിന്റെ അടിസ്ഥാനത്തില്‍ നടത്തിയ വിശദമായ അന്വേഷണത്തിലാണ് കൊലപാതക സൂചന ലഭിച്ചത്. യുവതിയെ കൊലപ്പെടുത്തിയ ശേഷം ഇരച്ചില്‍പാലം ജലാശയത്തില്‍ ഉപേക്ഷിച്ചതായി പ്രതികള്‍ സമ്മതിച്ചതായും വിവരമുണ്ട്. ഇന്നലെ തെരച്ചില്‍ നടത്തിയെങ്കിലും മൃതദേഹം കണ്ടെത്താനായില്ല. വിശദമായ അന്വേഷണത്തിനു ശേഷം മാത്രമെ അറസ്റ്റ് രേഖപ്പെടുത്തുകയുള്ളു.