കോഴിക്കോട്: ലയണ്‍സ് ഡിസ്ട്രിക്ട് 318-ഇയുടെ നേതൃത്വത്തില്‍ സംഘടിപ്പിക്കുന്ന സമൂഹവിവാഹം നാളെ നടക്കും. തളി പത്മശ്രീ കല്യാണ മണ്ഡപത്തില്‍ രാവിലെ 11.30നും 12നും ഇടയില്‍ നടക്കുന്ന ചടങ്ങില്‍ നിര്‍ധന കുടുംബങ്ങളില്‍പ്പെട്ട ഏഴ് യുവതീ-യുവാക്കള്‍ വിവാഹിതരാകുമെന്ന് ഭാരവാഹികള്‍ വാര്‍ത്താസമ്മേളനത്തില്‍ പറഞ്ഞു.
കോഴിക്കോട് കോര്‍പറേഷന്‍ മേയര്‍ തോട്ടത്തില്‍ രവീന്ദ്രന്‍ ഉദ്ഘാടനം ചെയ്യും. ശിവപ്രസാദ് അധ്യക്ഷനാകും. വധുവിന് സ്വര്‍ണവും വിവാഹ സാരിയും വരന് വിവാഹ വസ്ത്രവും മറ്റ് ഉപഹാരങ്ങളും നല്‍കും. വിവാഹ സദ്യയും ഏര്‍പ്പെടുത്തിയിട്ടുണ്ട്. വാര്‍ത്താസമ്മേളനത്തില്‍ ഭാരവാഹികളായ കെ.ടി അജിത്, ഗണേഷ് കണിയാറക്കല്‍, ബ്രിജി കിഷോര്‍, വി.കെ കൃഷ്ണകുമാര്‍, പി. സോമസുന്ദരന്‍, വത്സലാ ഗോപിനാഥ് സംബന്ധിച്ചു.