മഞ്ചേരി: ഗവ:ബോയ്‌സ് ഹയര്‍സെക്കന്‍ഡറി സ്‌കൂളിലെ ഉപയോഗ ശൂന്യമായ പേനകള്‍ കൊച്ചിയിലെ മുസ്‌രിസ് ബിനാലെയിലേക്ക്. സ്‌കൂളിലെ എന്‍.എസ്.എസ് യൂനിറ്റ്, ദേശീയ ഹരിത സേന എന്നീ ക്ലബുകളുടെ നേതൃത്വത്തിലാണ് ഉപയോഗ ശൂന്യമായ പേനകള്‍ ശേഖരിച്ചത്. 600 വിദ്യാര്‍ഥികള്‍ പഠിക്കുന്ന കാംപസില്‍ നിന്നും ആയിരത്തിലധികം പേനകള്‍ ശേഖരിച്ചു. മഷി പേനകള്‍ക്കു പ്രാധാന്യം നല്‍കുക എന്ന ലക്ഷ്യത്തോടെ കൊച്ചിയില്‍ മുസ്‌രീസ് ബിനാലെയുടെ ഭാഗമായി നടക്കുന്ന പെന്‍ഡ്രൈവ് എന്ന ഇന്‍സ്റ്റലേഷന്‍ പ്രോഗ്രാമിലേക്കാണു ശേഖരിച്ച പേനകള്‍ അയച്ചുകൊടുക്കുന്നത്. സാന്‍ഫ്രാന്‍സിസ്‌കോയില്‍ നിന്നും പഠനം പൂര്‍ത്തിയാക്കിയ ലക്ഷ്മി മേനോന്റെ നേതൃത്വത്തിലാണ് പെന്‍ഡ്രൈവ് ഇന്‍സ്റ്റലേഷന്‍ ഒരുങ്ങുന്നത്. ഏകദേശം രണ്ടു ലക്ഷത്തോളം പേനകള്‍ സംസ്ഥാനത്തിന്റെ വിവിധ ഭാഗങ്ങളില്‍ നിന്നായി കൊച്ചിയിലെത്തിയിട്ടുണ്ട്. സ്‌കൂളുകളില്‍ നിന്നും പേനകള്‍ ശേഖരിച്ചു നല്‍കാന്‍ താല്‍പര്യമുള്ളവര്‍ക്ക് പെന്‍ഡ്രൈവ് കാംപയിന്‍, കൊച്ചിന്‍ മുസ്‌രിസ് ബിനാലെ ഫൗണ്ടേഷന്‍, കുന്നുംപുറം, ഫോര്‍ട്ട് കൊച്ചി, 682001 എന്ന വിലാസത്തില്‍ അയക്കാം.