നിയോണ്‍: യുവേഫ യൂറോപ്പ ലീഗ് ഫൈനലിലെ കളിപ്രേമികളുടെ മോശം പെരുമാറ്റത്തെ തുടര്‍ന്ന് ലിവര്‍പൂള്‍, സെവിയ്യ ടീമുകള്‍ക്കെതിരേ അച്ചടക്ക നടപടി വന്നേക്കും. ഇക്കാര്യത്തില്‍ അന്തിമ വിധി ജൂലൈ 21ന് ഉണ്ടാവുമെന്ന് യുവേഫ അച്ചടക്ക പാനല്‍ വ്യക്തമാക്കി.

ഫൈനലില്‍ ലിവര്‍പൂള്‍ ഒരു ഗോളിന് മുന്നിട്ടു നില്‍ക്കെ സെവിയ്യന്‍ ആരാധകര്‍ തമ്മില്‍ കയ്യാങ്കളി ഉണ്ടാവുകയായിരുന്നു. തുടര്‍ന്ന് പൊലിസും സുരക്ഷാ ജീവനക്കാരും ഇരുവര്‍ക്കുമിടയില്‍ ബാരിക്കേഡുകള്‍ സ്ഥാപിക്കുകയായിരുന്നു. മത്സരത്തിനിടെ ലിവര്‍പൂള്‍ താരങ്ങള്‍ക്ക് നേരെ പ്ലാസ്റ്റിക് കുപ്പികള്‍ വലിച്ചെറിഞ്ഞെന്നാണ് സെവിയ്യന്‍ ആരാധകര്‍ക്കെതിരേയുള്ള കുറ്റം.

ഇവര്‍ ലിവര്‍പൂള്‍ ആരാധകര്‍ക്കെതിരേയും സമാന കുറ്റം നടത്തിയിട്ടുണ്ട്. ഗ്രൗണ്ടില്‍ പടക്കം പൊട്ടിച്ചതിനാണ് ലിവര്‍പൂള്‍ അച്ചടക്ക നടപടി നേരിടുന്നത്.