അബുജ: നൈജീരിയയില്‍ രണ്ട് സ്‌കൂള്‍ വിദ്യാര്‍ഥിനികള്‍ നടത്തിയ ചാവേറാക്രമണത്തില്‍ 45 പേര്‍ കൊല്ലപ്പെട്ടു. നൈജീരിയയിലെ വടക്കുകിഴക്കന്‍ നഗരമായ മഡഗാലിയിലെ ആള്‍ത്തിരക്കുള്ള മാര്‍ക്കറ്റിലാണ് സംഭവം. ആക്രമണത്തില്‍ 33ലേറെ പേര്‍ക്കു പരുക്കേറ്റു.
2015ല്‍ ബോകോ ഹറാമില്‍നിന്ന് നൈജീരിയന്‍ സേന തിരിച്ചുപിടിച്ച പ്രദേശമാണ് മഡഗാലി. പച്ചക്കറി, ധാന്യ മാര്‍ക്കറ്റിന്റെ രണ്ടു വശങ്ങളില്‍നിന്നാണ് ആക്രമണമുണ്ടായത്. പരുക്കേറ്റവരെ ഉടന്‍ അടുത്തുള്ള ആശുപത്രികളിലെത്തിച്ചു.
കഴിഞ്ഞ വര്‍ഷം ഡിസംബറില്‍ ഇതേ മാര്‍ക്കറ്റിനടുത്തുള്ള ബസ് സ്റ്റാന്‍ഡില്‍ രണ്ട് വനിതാ ചാവേറുകള്‍ നടത്തിയ ആക്രമണത്തില്‍ 30 പേര്‍ കൊല്ലപ്പെട്ടിരുന്നു. ബോകോ ഹറാമാണ് ചാവേറാക്രമണത്തിനു പിന്നിലെന്നു സര്‍ക്കാര്‍വൃത്തങ്ങള്‍ ആരോപിച്ചു. എന്നാല്‍, ആക്രമണത്തിന്റെ ഉത്തരവാദിത്തം ബോകോ ഹറം ഏറ്റെടുത്തിട്ടില്ല.