ന്യൂഡല്‍ഹി: കേരളത്തിലെ സി.പി.എം അക്രമങ്ങളില്‍ പ്രതിഷേധിച്ച് ബി.ജെ.പി പ്രവര്‍ത്തകര്‍ ഡല്‍ഹിയിലെ എ.കെ.ജി ഭവനിലേക്ക് പ്രതിഷേധ മാര്‍ച്ച് നടത്തി. കേന്ദ്ര മന്ത്രി രവിശങ്കര്‍ പ്രസാദിന്റെ ഭീഷണിപ്പെടുത്തലിനു പിന്നാലെയാണ് ഇന്ന് ബി.ജെ.പി മാര്‍ച്ച് നടത്തിയത്.

മാര്‍ച്ച് തടയാന്‍ പൊലിസ് സ്ഥാപിച്ച മൂന്നു ബാരിക്കേഡുകള്‍ കയറിയെത്തി ബി.ജെ.പി പ്രവര്‍ത്തകര്‍ ഒഫിസിന്റെ ബോര്‍ഡ് തകര്‍ത്തു. ഇത് സി.പി.എം ഓഫിസിലുള്ളവര്‍ തടയാന്‍ ശ്രമിച്ചതോടെ ചെറിയ സംഘര്‍ഷമുണ്ടായി. ഇതേത്തുടര്‍ന്ന് പൊലിസ് ഇടപെടുകയും ചിലരെ അറസ്റ്റ് ചെയ്തു നീക്കുകയും ചെയ്തു.

'പിണറായി വിജയന്റെ അക്രമ രാഷ്ട്രീയം അവസാനിപ്പിക്കണം' എന്ന് മുദ്രാവാക്യം വിളിച്ച് കൊണ്ടാണ് പ്രതിഷേധക്കാര്‍ എ.കെ.ജി ഭവനിലേക്ക് മര്‍ച്ച് നടത്തിയത്.

കേന്ദ്രം ഭരിക്കുന്നത് ബി.ജെ.പിയാണെന്ന് ഓര്‍മ വേണമെന്ന് മുതിര്‍ന്ന ബി.ജെ.പി നേതാവും കേന്ദ്ര ടെലികോം മന്ത്രിയുമായ രവിശങ്കര്‍ പ്രസാദ് ഇന്നലെ സി.പി.എമ്മിന് മുന്നറിയിപ്പു നല്‍കിയിരുന്നു. കേരളത്തില്‍ സി.പി.എം നടത്തുന്ന അക്രമത്തെ പാര്‍ലമെന്റിനകത്തും തെരുവിലും നേരിടുമെന്നും അദ്ദേഹം പറഞ്ഞിരുന്നു.