കൊല്ലം: വീണ്ടും മൈക്രോഫിനാന്‍സ് തട്ടിപ്പ്. ഇത്തവണ എടുക്കാത്ത വായ്പയുടെ കുടിശ്ശിക അടയ്ക്കാന്‍ നോട്ടിസയച്ചാണ് തട്ടിപ്പെന്നാണ് പരാതി .  ആര്‍.പി.എസ്.എസ്  കല്ലുംതാഴം ശാഖയിലെ 23 വനിതാ അംഗങ്ങളാണ് കൊല്ലം എസ്. എന്‍. ഡി. പി   യൂനിയനെതിരേ പരാതിയുമായി  രംഗത്തെത്തിയിരിക്കുന്നത്. തങ്ങളുടെ പേരില്‍ തട്ടിപ്പ് നടത്തിയതിനെതിരേ അംഗങ്ങള്‍ കൊല്ലം മുന്‍സിഫ് കോടതിയെ സമീപിച്ചിരിക്കുകയാണ്. ഇവരുടെ പേരില്‍ മറ്റാരോ വായ്പയെടുത്തു തട്ടിപ്പ് നടത്തിയതായാണു സൂചന. എന്നാല്‍ പണം തിരിച്ചടയ്ക്കുന്നതില്‍ വീഴ്ച വരുത്തിയതിനാലാണ് നോട്ടിസ് അയച്ചതെന്നാണ് യൂനിയന്റെ വിശദീകരണം. കുടിശ്ശിക വരുത്തിയ തുക 15 ദിവസത്തിനുള്ളില്‍ തിരിച്ചടയ്ക്കണമെന്നാണ്  വക്കീല്‍ നോട്ടിസിലുള്ളത്.  
നോട്ടിസ് കൈപ്പറ്റിയ ശേഷമാണ് ഇവരില്‍ പലരും വായ്പയുണ്ടെന്നുള്ള വിവരം പോലും അറിഞ്ഞത്.  20 അംഗങ്ങള്‍ വരെയുള്ള യൂനിറ്റുകളായി തിരിച്ചാണ് വായ്പ വിതരണം ചെയ്തത്.  അര്‍ഹതയില്ലെന്ന് കാണിച്ച് പലരെയും ഇതില്‍ നിന്ന് ഒഴിവാക്കിയിരുന്നു. എന്നാല്‍ ഒഴിവാക്കിയവരുള്‍പ്പെടെയുള്ളവരുടെ പേരില്‍ ഉത്തരവാദപ്പെട്ടവര്‍ പണം വാങ്ങിച്ചെടുക്കുകയായിരുവെന്നാണ് വനിതകളുടെ സംശയം. യൂനിറ്റില്‍ ചേരുന്നതിനായി നല്‍കിയ രേഖ ഉപയോഗിച്ച് തങ്ങളുടെ പേരില്‍ നേതൃത്വം പണം തട്ടിയതാണെന്ന് ഇവര്‍ ആരോപിക്കുന്നു.
എടുത്ത വായ്പ അടച്ചുതീര്‍ത്തവര്‍ക്കടക്കം  നോട്ടിസ് ലഭിച്ചിട്ടുണ്ട്. നോട്ടിസ് ലഭിച്ചവര്‍  കൊല്ലം യൂനിയനെ സമീപിച്ചപ്പോള്‍ പൈസ തിരിച്ചടച്ചില്ലെങ്കില്‍ നിയമനടപടിയുമായി മുന്നോട്ടുപോകും എന്ന മറുപടിയാണ് ലഭിച്ചതത്രെ. കല്ലുംതാഴം ശാഖയിലെ 23 അംഗങ്ങള്‍ക്കുമായി 1,65,000 വീതം കുടിശ്ശിക ഉണ്ടെന്നു കാണിച്ചാണ് യൂനിയന്‍ നോട്ടിസയച്ചത്. മെക്രോഫൈനാന്‍സ് തട്ടിപ്പിന്റെ പേരില്‍ യൂനിയന്‍ പ്രസിഡന്റിനും സെക്രട്ടറിക്കുമെതിരേ വനിതകള്‍ ഉള്‍പ്പെടുന്ന ശാഖാപ്രതിനിധികള്‍ യൂനിയന്‍ ഓഫിസിലേക്ക് പ്രതിഷേധപ്രകടനം നടത്തി.