കോഴിക്കോട്: പ്രതിസന്ധി പരിഹരിക്കാന്‍ സ്വന്തം നിലയില്‍ തുക കണ്ടെത്തണമെന്ന ധനമന്ത്രിയുടെ പ്രതികരണം കെ.എസ്.ആര്‍.ടി.സിയോടുള്ള നിഷേധനിലപാടല്ലെന്ന് ഗതാഗത മന്ത്രി എ.കെ ശശീന്ദ്രന്‍. ഇത് സദുദ്ദേശത്തോടുള്ള നിലപാടാണ്.
താന്‍ തോമസ് ഐസകുമായി ഫോണില്‍ സംസാരിച്ചിരുന്നു. ശമ്പളവും പെന്‍ഷനും നല്‍കാനായി 50 കോടി രൂപ സര്‍ക്കാര്‍ അനുവദിക്കുമെന്ന ശുഭപ്രതീക്ഷയാണ് തനിക്കു മന്ത്രി നല്‍കിയിരിക്കുന്നത്. ജീവനക്കാര്‍ക്ക് ശമ്പളവും വിരമിച്ചവര്‍ക്ക് പെന്‍ഷനും നല്‍കുന്നതിന് സര്‍ക്കാര്‍ സ്വീകരിച്ച ഒരു നിലപാടുണ്ട്.
പെന്‍ഷന്‍ നല്‍കാന്‍ വേണ്ട തുകയുടെ 50 ശതമാനം സര്‍ക്കാര്‍ നല്‍കണമെന്നാണ് ധാരണ. ഈ സര്‍ക്കാര്‍ നിലപാടില്‍ മാറ്റമുണ്ടാകാന്‍ സാധ്യതയില്ല.
കെ.എസ്.ആര്‍.ടി.സിയെ രക്ഷപ്പെടുത്താന്‍ കര്‍മപദ്ധതി തയാറാവുകയാണെന്നും മന്ത്രി പറഞ്ഞു.