പാലക്കാട് : തണുപ്പുള്ള പ്രദേശങ്ങളില്‍ മാത്രം കൃഷി ചെയ്തിരുന്ന നോള്‍കോള്‍ എന്ന പച്ചക്കറിയിനം നെല്ലിയാമ്പതിയിലും നന്നായി വിളഞ്ഞു. പ്രമേഹത്തിനും മറ്റും ഉപയോഗിക്കാന്‍ പറ്റുന്ന പച്ചക്കറിയിനമാണ് നോള്‍കോള്‍. ഇതിന്റെ കിഴങ്ങും, ഇലയും ഒരുപോലെ കറി വയ്ക്കാനായി ഉപയോഗിക്കാന്‍ കഴിയും. കിഴങ്ങിന് ഇറച്ചി കൂട്ടാണ് ഉപയോഗിക്കേണ്ടത്. ഇല വറുത്തുപയോഗിക്കാം. പരീക്ഷണാര്‍ഥം ആദ്യമായാണ് നെല്ലിയാമ്പതി ഓറഞ്ച് ഫാമില്‍ നോള്‍ക്കോള്‍ കൃഷി ചെയ്തത്. ഊട്ടിയില്‍നിന്നാണ് വിത്ത് കൊണ്ടുവന്നത്. ഇപ്പോള്‍ അര ഏക്കറിലാണ് ഈ കൃഷി ഉള്ളത്. ഒരു കിലോ 50 രൂപയ്ക്കാണ് വില്‍പന. ഫാമിന്റെ വില്‍പന സ്റ്റാളില്‍ കിട്ടും. നല്ല ഡിമാന്‍ഡുണ്ടെങ്കിലും ആവശ്യക്കാര്‍ക്ക് മുഴുവന്‍ നല്‍കാന്‍ പറ്റുന്നില്ലെന്നും ഉദ്യോഗസ്ഥര്‍ പറയുന്നു.
ഇതിന് പുറമെ ബ്രോക്കോളി, ക്വാളിഫ്‌ളവര്‍, ബീന്‍സ,് ഉരുളകിഴങ്ങ് തുടങ്ങിയ പച്ചക്കറികളും ഇവിടെ കൃഷി ചെയ്തിട്ടുണ്ട്. മൊത്തം 12 ഏക്കറില്‍ പച്ചക്കറി കൃഷി ചെയ്തു വരുണ്ടെന്ന് ഫാം സൂപ്രണ്ട് യുസഫ് പറഞ്ഞു.