പടിഞ്ഞാറത്തറ: പടിഞ്ഞാറത്തറ അങ്ങാടിക്ക് സമീപവും പേരാല്‍വയലിലും കാട്ടുപന്നിശല്യം വര്‍ധിച്ചു. സന്ധ്യയോടെ കൂട്ടങ്ങളായി നാട്ടിലിറങ്ങുന്ന പന്നികള്‍ വന്‍ കൃഷിനാശമാണ് വരുത്തുന്നത്. കപ്പയും ചേമ്പുമടക്കം ഭക്ഷ്യവിളകളാണ് ചിവിട്ടിയും മാന്തിയും തിന്നും നശിപ്പിക്കുന്നതില്‍ അധികവും. കഴിഞ്ഞ  ദിവസം പന്നികള്‍ തെക്കേത്തൊടി ജസി, വണ്ടേലില്‍ തങ്കച്ചന്‍, ചെല്ലിയോടുമ്മല്‍ ഇബ്രാഹിം, വെള്ളാനയില്‍ ബെന്നി എന്നിവരുടെ കൃഷി നശിപ്പിച്ചു. 13ാം മൈലിനടുത്തുന്ന വനത്തില്‍നിന്നാണ് പന്നികള്‍ നാട്ടിലിറങ്ങുന്നത്. ഇവ വരുത്തുന്ന കൃഷിനാശത്തിനു അര്‍ഹമായ നഷ്ടപരിഹാരം കര്‍ഷകര്‍ക്ക് ലഭിക്കുന്നില്ല. ബാങ്കുവായ്പയെടുത്ത് കൃഷിയിറക്കിയവര്‍ തിരിച്ചടവ് എങ്ങനെ നടത്തുമെന്ന ആകുലതയിലാണ്. പന്നികളെ പ്രതിരോധിക്കുന്നതിനു കര്‍ഷകരില്‍ ചിലര്‍ കൃഷിയിടത്തിനു ചുറ്റും പ്ലാസ്റ്റിക് വലകൊണ്ട് വേലികെട്ടിയും പരീക്ഷണം നടത്തുന്നുണ്ട്.