വാണിമേല്‍: സാമൂഹ്യ ബോധവും അര്‍പ്പണ മനസ്സുമാണ് മനുഷ്യ ജീവിതത്തെ സാര്‍ഥകമാക്കുന്നതെന്നും പൊതു മേഖലകളിലെ സേവനങ്ങളിലൂടെ മനുഷ്യര്‍ക്ക് മാലാഖമാരുടെ പദവിയിലേക്ക് ഉയരാമെന്നും പാണക്കാട് സയ്യിദ് ഹമീദലി ശിഹാബ് പറഞ്ഞു. അഞ്ചു ദിവസമായി കുയ്‌തേരിയില്‍ മഹല്ല് പ്രവാസി കൂട്ടായ്മയും ശാഖ എസ്.കെ.എസ്.എസ്.എഫ് കമ്മിറ്റിയും സംയുക്തമായി സംഘടിപ്പിച്ച പഞ്ചദിന മത പ്രഭാഷണ പരിപാടിയുടെ സമാപന സമ്മേളനം ഉദ്ഘാടനം ചെയ്യുകയായിരുന്നു തങ്ങള്‍. ടി.എം.വി അബ്ദുല്‍ ഹമീദ് അദ്ധ്യക്ഷനായി. ചേലക്കാട് മുഹമ്മദ് മുസ്‌ലിയാര്‍ പ്രാര്‍ഥന നടത്തി. വില്ല്യാപ്പള്ളി ഇബ്‌റാഹീം മുസ്‌ലിയാര്‍, ബഷീര്‍ ഫൈസി ചീക്കോന്ന്, സൂപ്പി നരിക്കാട്ടേരി, അഹമ്മദ് പുന്നക്കല്‍, സി.വി.എം വാണിമേല്‍, എം.കെ അഷ്‌റഫ് തുടങ്ങിയവര്‍ സംസാരിച്ചു. സിംസറുല്‍ ഹഖ് ഹുദവി അബൂദാബി മുഖ്യ പ്രഭാഷണം നടത്തി. കുയ്‌തേരി മഹല്ല് പ്രവാസി കൂട്ടായ്മയുടെ റിലീഫ് ഉദ്ഘാടനം ടി.എം.വി കുഞ്ഞമ്മദ് ഹാജിയില്‍ നിന്ന് സംഭാവന സ്വീകരിച്ച് തങ്ങളും 'നാട്ടു നന്മ' സപ്ലിമെന്റ് മഹല്ല് ഖത്തീബ് അബ്ദുസ്സലാം ദാരിമി അടിവാരം മഹല്ല് പ്രസിഡന്റ് എം.കെ മൊയ്തുവിന് നല്‍കിയും നിര്‍വഹിച്ചു. തയ്യിബ് റഹ്മാനി സ്വാഗതവും നിയാസ് പി.കെ നന്ദിയും പറഞ്ഞു.