തിരൂരങ്ങാടി: ദാറുല്‍ഹുദാ ഇസ്‌ലാമിക് യൂനിവേഴ്‌സിറ്റിയുടെ നാലാമത് ഓഫ് കാംപസിനു ഇന്ന് ഉത്തര കര്‍ണാടകയിലെ ഹാവേരി ജില്ലയിലെ ഹാംഗലില്‍ ചാന്‍സലര്‍ കൂടിയായ പാണക്കാട് സയ്യിദ് ഹൈദരലി ശിഹാബ് തങ്ങള്‍ തറക്കല്ലിടും. വൈസ് ചാന്‍സലര്‍ ഡോ. ബഹാഉദ്ദീന്‍ മുഹമ്മദ് നദ്‌വി അധ്യക്ഷനാകും. സംസ്ഥാനത്തെ മത - രാഷ്ട്രീയ രംഗത്തെ പ്രമുഖര്‍ ചടങ്ങില്‍ സംബന്ധിക്കും.

ദീനീ തല്‍പരനും വ്യവസായ പ്രമുഖനുമായൊരു വ്യക്തി ദാറുല്‍ഹുദാക്ക് ദാനമായി നല്‍കിയ 6.14 ഏക്കര്‍ സ്ഥലത്താണ് ഓഫ് കാംപസ് ആരംഭിക്കുന്നത്. സീമാന്ധ്രയിലെ പുങ്കനൂര്‍, വെസ്റ്റ് ബംഗാളിലെ ഭീര്‍ഭൂം, ആസാമിലെ ബൈശ എന്നിവിടങ്ങളിലെ ഓഫ് കാംപസുകള്‍ക്ക് ശേഷമാണ് നാലാമത് കാംപസിനു കര്‍ണാടകയില്‍ തറക്കല്ലിടുന്നത്. നിലവില്‍ സംസ്ഥാനത്ത് കാശിപട്ണ, മാടന്നൂര്‍ എന്നിവിടങ്ങളില്‍ ദാറുല്‍ഹുദായുടെ യു.ജി കോളജുകളും പ്രവര്‍ത്തിക്കുന്നുണ്ട്. അടുത്ത റമദാനു ശേഷം താല്‍ക്കാലിക കെട്ടിടത്തില്‍ ക്ലാസുകള്‍ ആരംഭിക്കാനാണ് തീരുമാനം.