മാഡ്രിഡ്: സ്പാനിഷ് ലാ ലിഗയില്‍ കരുത്തരായ അത്‌ലറ്റിക്കോ മാഡ്രിഡിനെ വിയ്യാറല്‍ അട്ടിമറിച്ചു. മറുപടിയില്ലാത്ത മൂന്നു ഗോളുകള്‍ക്കാണ് വിയ്യാറല്‍ വിജയം പിടിച്ചത്. ജയത്തോടെ പോയിന്റ് പട്ടികയില്‍ നാലാമതെത്താനും ടീമിനായി. മറ്റൊരു മത്സരത്തില്‍ റയല്‍ ബെറ്റിസ് 1-0ത്തിനു അത്‌ലറ്റിക്ക് ബില്‍ബാവോയെ പരാജയപ്പെടുത്തി.
ഇറ്റാലിയന്‍ സീരി എയില്‍ ഇന്റര്‍ മിലാന്‍, റോമ ടീമുകള്‍ക്ക് വിജയം. ഇന്റര്‍ മിലാന്‍ മറുപടിയില്ലാത്ത രണ്ടു ഗോളുകള്‍ക്ക് ജെനോവയെ പരാജയപ്പെടുത്തി. റോമ 1-0ത്തിനു എ.സി മിലാനെ വീഴ്ത്തി. ജയത്തോടെ പോയിന്റ് പട്ടികയില്‍ രണ്ടാം സ്ഥാനത്തെത്താനും റോമയ്ക്കായി. യുവന്റസാണ് ഒന്നാം സ്ഥാനത്ത്.
ഫ്രഞ്ച് ലീഗ് വണില്‍ ഒന്നാം സ്ഥാനത്ത് കുതിക്കുന്ന നീസും നിലവിലെ ചാംപ്യന്‍മാരായ പാരിസ് സെന്റ് ജെര്‍മെയ്‌നും 2-2നു സമനിലയില്‍ പിരിഞ്ഞു. ആദ്യ പകുതിയില്‍ രണ്ടു ഗോളിനു മുന്നില്‍ നിന്ന നീസിനെതിരേ രണ്ടാം പകുതിയില്‍ എഡിന്‍സന്‍ കവാനി നേടിയ ഗോളിലാണ് പി.എസ്.ജി സമനില പിടിച്ചത്. പോയിന്റ് പട്ടികയില്‍ നീസ് ഒന്നാം സ്ഥാനത്ത് തുടരുന്നു. മൊണാക്കോ രണ്ടാമതും പി.എസ്.ജി മൂന്നാം സ്ഥാനത്തും നില്‍ക്കുന്നു.